VOV4.Bahnar - Pơgê năr 20/6, tơ̆ tơring sơlam tĕh đak ƀar păh apŭng Lộc Ninh, dêh char Bình Phước hăm apŭng Me-mốt (Memot), dêh char Tbông Khmum (Tbong Khmum), Campuchia; Thủ tướng Hun Sen hlôi pơm tơm pơm lêh sơng Thủ tướng Phạm Minh Chính hăm Khul kơdră tang măt Việt Nam vang năm rim tơdrong pơgơ̆r tơbăt găh păh Campuchia.

Iung pơma tơ̆ pơm lêh, mĭnh ‘măng dơ̆ng Thủ tướng Campuchia sơkơ̆t hơdăh tơdrong jang kơ Việt Nam ‘nŏh tôch trŏ ƀlep, rim ƀô̆ đô̆i Việt Nam hlôi vang jang hơdoi hăm Campuchia lơ̆m tơdrong jang pơm rơngei tĕh đak, dŏng kon pơlei Campuchia yak hlŏh chăl pơlôch rŭng Pol Pot, iung erĭh păng atŏk tơ iung tĕh đak. Ƀar Thủ tướng pơma tơbăt jơhngơ̆mn chơt hơ iă tơdrong tơgoăt tơgoăl, jang hơdoi joăt joe đơng sơ̆ păng tơgoăt tơgoăl jang hơdoi tôm tong ‘lơ̆ng rŏ ƀar păh Việt Nam hăm Campuchia hơnơ̆ng đei hơmet pơ ‘lơ̆ng păng atŏk tơ iung lơ̆m lơ tơdrong, hơnhăk đei iŏk yau kơ jăp ăn kon pơlei ƀar tĕh đak, tơgop git kăl lơ̆m rơngei hiôk hian, sơđơ̆ng, atŏk tơ iung lơ̆m tơring păng lơ̆m apŭng plĕnh teh. Ƀar Thủ tướng sơkơt hơdăh lăng kơ jăp tơdrong tơgoăt tơgoăl “tĕh đak tơ jê̆ ‘lơ̆ng hơ iă, tơgoăt joăt joe, jang hơdoi tôm tong, kơ jăp ‘lơ̆ng đunh đai tai sơnăm” tôch gĭt kăl kơ ƀar hơdrĕch hơdrung.

Tơblơ̆ nơr: Amazưt