Sơnăm ‘nâu, Grŭp jang Đak dâu Việt Nam (Petrovietnam) hlôi jang đang tôm trong tơlĕch jang kơ sơnăm hăm iŏk yua đei 1 triệu ti hlak jên, nôp ăn teh đak 164 rơbâu ti hlak jên. Petrovietnam hlôi tơlĕch jang dôm tơdrong jang tơm tôch kơ tih, kơmăy kơmŏk ‘nao nhen tơdrong jang đak dâu - ŭnh điên Lô B - Ô Môn păng tơdrong jang Lạc Đà Vàng.

Pơma tơ̆ tơdrong jang, Thủ tướng Phạm Minh Chính hmach chơt hơiă păng chih iŏk tơdrong hơdrin tôch kơ tih kŭm hăm dôm hơyak năm tŏk đơ̆ng Petrovietnam păng Kŏng ti tơm Pơvih pơvăn Ki thuơ̆t đak dâu Việt Nam lơ̆m tơdrong tơlĕch jang dôm tơdrong jang đak dâu gĭt kăl păng tơdrong jang ŭnh hơyuh rơgoh, lơ̆m noh hơdrô̆ dôm tơdrong jang ŭnh điên kial tơ̆ đak dơsĭ đei akŏm kơjă pơm hla ar jang dang 2 ti đô lar. Thủ tướng ‘meh vă Grup jang păng Kŏng ti tơm jang ‘lơ̆ng pran kơtang hloh, hăm jang tŏk hrĕnh hloh 2 ‘măng lơ̆m dôm sơnăm truh, iŏk đei dang 15-20% rim sơnăm; tơgop pơtrŭt jang tŏk GDP lơ̆m teh đak iŏk đei hrĕnh hloh, đei dang 8% lơ̆m sơnăm 2025.