VOV4.Bahnar - Pơ ma lơ̆m hop akŏm mŭk drăm atŭm, hơp tak xăh (HTX) sơ năm 2022 hăm hơ năn “Tơ plih hăm kơ măy sô̆ - Jơ hngâm pran vă jang tŏk mŭk drăm atŭm, HTX lơ̆m chăl ‘nao tơ klep hăm bơ̆ jang kiơ̆ tơ drong Tơ chơ̆t kơ sô̆ 20- NQ/TW” pơ gơ̆r pơ gê 23/9, Thủ tướng Phạm Minh Chính pơ ma hơ dăh, tơ plih ‘nao hăm kơ măy sô̆ ‘nŏh jĭ tơ drong kăl jang kiơ̆ mă ‘lơ̆ng vă jang atŏk tơ iung mŭk drăm atŭm, HTX, tơ drong ‘nâu ưh gơ̆h ưh jang, ưh gơ̆h dơ̆ng tơ̆ ‘ngoăih; yoa thoi nŏh, bơ̆n athei tơ plih ‘nao đon tơ chĕng, pơ tơm đơ̆ng đon hlôh vao; băt lăng hơ tăih, tôm tơ drong; hơ tŏk loi dơ̆ng tơ drong iŏk yoa khoa hŏk kơ măy kơ mŏk ‘nao, kơ măy roi tơ băt, hơ tŏk tơ drong pơ chĕh rơ gei, akŏm rim jơ hngâm vă bơ̆ jang kiơ̆ tom, yak tŏk hơ dai hăm dôm tơ ring jang mŭk drăm nai. Hop akŏm pơ gơ̆r kiơ̆ trong trư̆k tuyê̆n hơ dai hăm pơ gơ̆r kơ tă hai.

Jơ pơ gơ̆r Hop akŏm

Tơ̆ hop akŏm, dôm bơ ngai tang măt pơ ma nuh, hơ len năng dôm tơ drong jang đei mưh tơ plih hăm kơ măy sô̆ kơ tĕh đak pơ ma atŭm păng tơ plih hăm kơ măy sô̆ tơ̆ tơ ring jang mŭk drăm atŭm, HTX pơ ma adrô̆; atŭm hăm ‘nŏh pơ ma hơ dăh dôm tơ drong tam mă pran ‘lơ̆ng, oei mơ mat tat, pơ long nol păng dôm tơ drong kăl đei tơ lĕch dang ei vă đei trong jang lăp ‘lơ̆ng vă hơ tŏk tơ drong tơ plih hăm kơ măy sô̆ tơ̆ hơ năp kơnh, pơ jing jơ hngâm pran ăn anih jang mŭk drăm atŭm, HTX jang tŏk hrĕnh păng kơ jăp, tơ klep hăm jang kiơ̆ Tơ drong tơ chơ̆t kơ sô̆ 20 đơ̆ng Trung ương.

Dơ̆ng: Tơ blơ̆