Tơdrong jang pơm trong tơley ŭnh điên500 kV jăl 3 đei Grŭp jang Ŭnh điên Việt Nam pơjao ăn Kŏng ti tơm jang Ŭnh điên Teh đak pơm tơ ‘ngla tơmơ̆t jên jang, đei akŏp kơ jung 519 km, 1.177 hơnih jrăng, 513 hơnih hơtaih băl, dăng klĕch 211 xăh/phường kơ 43 apŭng găh 09 dêh char hăm akŏp kơ sô̆ jên tơmơ̆t jang hloh 22.300 ti hlak jên. Pơma tơ̆ hop akŏm, Thủ tướng Phạm Minh Chính tơƀôh rơđăh, kiơ̆ đơ̆ng tơdrong jang ‘nâu tơgop pơm hơtŏk ‘lơ̆ng bưng ai, anih dơ̆ng đơ̆ng anih jang ŭnh điên lơ̆m teh đak păng apŭng plĕnh teh; tơƀôh hơdăh tơdrong lui ngeh, đon nuih đơ̆ng anih jang ŭnh điên.

Thủ tướng pơma hơdăh Đảng hlôi pơgơ̆r, Khŭl kơdră hlôi drơ̆ng nơ̆r, Quốc hội drơ̆ng lăp, Kon pơlei tơgŭm, ‘noh lăp pơma dơnuh jang hloi đĕch, ưh kơ pơma dơnuh kơdŭn ôh. Găh hơnăp jang kơ sơnăm 2024, Thủ tướng hơlen lăng Anih jang Ŭnh điên jang đang hơgei hloh hơnăp jang, tôch kơ ‘meh Anih jang ŭnh điên ‘noh sơnăm 2025 găh jơnei athei lơ hloh kơ sơnăm 2024 păng hơnơ̆ng ưh kơ lê̆ ưh kơ măh ŭnh điên.