Tơdrong jang pơm cham gre păr Gia Bình jĭ tơdrong jang kăl găh sơđơ̆ng - khŭl lĭnh, pơyua ăn đei iŏk yua tơdrong jang pơgơ̆r, vei lăng đơ̆ng Khŭl lĭnh Kŏng an kon pơlei. Tơdrong jang đei pơm tôch kơ tih, đei hơiă proh hơmet, pơm ‘lơ̆ng hơdrô̆, tơƀôh tơdrong hơiă, hơƀĕch hơbal, ‘nao đơ̆ng khŭl lĭnh Kŏng an kon pơlei pơma atŭm, khŭl lĭnh Cảnh sát cơ động pơma hơdrô̆. Mă loi ‘noh jĭ tơdrong jang đei tơdrong ‘lơ̆ng jơhnơr hơrih, jang kiơ̆ ‘lơ̆ng Tơdrong tơchơ̆t kơsô̆ 12 đơ̆ng Anih tơm Chĭnh trĭ, tơƀôh hơdăh hơnhăk khŭl lĭnh Cảnh sát cơ động yak tŏk ‘nao.

Pơma tơ̆ tơdrong jang, Thủ tướng Phạm Minh Chính pơma hơdăh, kŏng an kon pơlei ‘noh jĭ khŭl lĭnh tơm lơ̆m jang kiơ̆ hơnăp jang vei lăng sơđơ̆ng teh đak, vei sơđơ̆ng tơpôl, iung jang tang găn pơm glăi păng dôm tơdrong pơm glăi khôi luơ̆t găh vei sơđơ̆ng teh đak, sơđơ̆ng tơpôl. Lơ̆m tơdrong ‘nao, ming man cham gre păr Gia Bình ‘noh jĭ 1 păh pơm lăp hăm ‘meh vă pơjing khŭl lĭnh kŏng an hơgei, ‘nao lơ̆m tơdrong ‘nao păng athei pơjing cham gre păr Gia Bình kiơ̆ trong đei yua. Thủ tướng athei Anih tơm Kŏng an iŏk jang hăm jơhngơ̆m đon 3 hloh: iŏk jang hrĕnh hloh, ‘lơ̆ng hloh, kơjă re hloh păng lơ̆m dang 18 khei athei jang đang tơdrong jang.