Hăm hơnăn "Tơplih trong pơm tơlĕch tơmam drăm xa 'lơ̆ng, kơjăp xơđơ̆ng, pơtrŏ hăm hơyuh tô̆ 'mi tơplih păng lơ̆m khei năr rơhiŭng rơhiăng 'nao". Tơ̆ jơ xơng, Kơdră Jơnŭm pơgơ̆r teh đak Việt Nam pơkăl rim teh đak tŏk bŏk oei hơtŏk jang tơnăp tơdrong jang hadoi Nam-Nam, lơ̆m noh Việt Nam kơchăng tơroi tơdrong hlôh vao păng jang hadoi hăm dôm teh đak lơ̆m hơtŏk choh pơtăm, tơring pơxĕl, xut lê̆ pơngot tơjur hin dơnuh, vei xơđơ̆ng măh tơmam drăm xa kiơ̆ đơ̆ng dôm tơdrong jang hadoi Nam – Nam, jang hadoi 3 păh hăm tơdrong tơgŭm, yak hadoi đơ̆ng dôm teh đak jang hadoi ƀar păh păng lơ teh đak lơ̆m kơpal teh. Vă pơm jang đei jơnei tơdrong tơplih trong pơm tơlĕch tơmam drăm xa păng hơtŏk jang hadoi apŭng plenh teh găh choh pơtăm, tơring pơxĕl lơ̆m khei năr truh, Thủ tướng pơkăl dôm păh đei tơrĕk kăl hơtŏk anih dơ̆ng po, xơnong jang găh choh pơtăm, pơjing trong jang, hơvơn jên axong jang, hơlen păng pơtho trong jang 'nao rơgei.