VOV4.Bahnar – Kơsơ̆ năr 3/10, Thủ tướng Phạm Minh Chính xơng pơma dơnuh yă Era Dabla-Norris, Kơdră khul hơlen kơ Anih mong jên apŭng plenh teh (IMF) găh jang mŭk drăm păng jên hu kơ dôm teh đak tŏk bŏk oei năm tơmang păng bơ̆ jang tơ̆ Việt Nam. Thủ tướng bơnê kơ dôm tơdrong adrin kăp gĭt mă IMF hlôi 'măn ăn Việt Nam đơ̆ng dôm xơnăm blŭng hơtŏk tơ iung truh dang ei, khei năr tơjê̆ âu nohh găh trong pơkăp jang, tơgŭm kih thuơ̆t păng pơtho bơngai jang, mă kăl noh dôm tơdrong tơblang, xơkơ̆t păng hơvơn dôm tơdrong jang vei lăng mŭk drăm lơ̆m khei năr pơrang jĭ COVID-19 hơbuh hli. Pơma đam găh tơdrong jang mŭk drăm Việt Nam, Thủ tướng ăn tơbăt, atŭm hăm tơdrong pơtoi hơlen pơrang jĭ COVID-19, tơdrong jang mŭk drăm Việt Nam dang ei pơtoi xơđơ̆ng păng hơmet 'lơ̆ng. Tơdrong pơgơ̆r jang đơ̆ng Khul Kơpal teh đak Việt Nam tŏk bŏk đei tơlĕch jang hơbĕch, tơnăp, tơtom, Thủ tướng pơkăl IMF tơrĕk tơgŭm Việt Nam jing minh teh đak tŏk bŏk oei hơtŏk tơ iung; hơtŏk tơdrong jang tơlĕch tơchơ̆t ăn đe Kơdră kơpal păng dôm anih jang kơpal găh pơgơ̆r jang mŭk drăm, tơjră hăm tơdrong răm đei ƀôh dang ei; pơtoi tơlĕch tơdrong pơtho, tơgŭm kih thuơ̆t ăn tơdrong vei lăng mŭk drăm; adrin tơgŭm Việt Nam hơtŏk mŭk drăm jơk, pơtrŏ hăm hơyuht tô̆ 'mi tơplih păng tơplih jang kiơ̆ trong 'nao dang ei.

VOV/Lan tơblơ̆ nơ̆r