VOV4.Bahnar - ‘Năr brei (3/7), tơ̆ Anih jang kơ Khul kơ dră tĕh đak, Jơ nŭm pơ jei-Pôk hơ păh Trung ương jăl jang 2021-2026 hop akŏm mă 3 hăm tơ drong pơ gơ̆r đơ̆ng Thủ tướng Phạm Minh Chính, Kơ dră chĕp kơ̆l Jơ nŭm.

Thủ tướng Phạm Minh Chính pơ gơ̆r hop akŏm Jơ nŭm pơ jei-pôk hơ păh

Pơ ma lơ̆m hop akŏm, Thủ tướng athei dôm bơ ngai tang măt tơ gop nơ̆r mă tơ păt ‘lơ̆ng, hơ len năng mă trŏ dôm tơ drong jang đei đơ̆ng dôm khul grŭp, rim bơ ngai, kiơ̆ đơ̆ng nŏh, Jơ nŭm pơm hla ar ƀơm truh kiơ̆ trong tơ păt ‘lơ̆ng, rơ đăh rơ đong, hơ tŏ băl, trŏ tơ drong hơ găt, tơ găl hăm dôm tơ drong jơ nei hlôi jang đei kiơ̆ tơ drong hơ găt đơ̆ng Đảng păng khôi luơ̆t tĕh đak. 

Thủ tướng athei pơm kĭơ mă ‘lơ̆ng tơ drong pơ jei, pôk hơ păh, trŏ ƀlep, rơ đăh rơ đong vă pơ jing jơ hngâm hưch hanh ăn rim bơ ngai, khul grŭp vă pơ yoa ăn tơ drong jang tơ iung pơ jing păng vei lăng tĕh đak, atŭm hăm ‘nŏh tơ gop ‘lơ̆ng ăn tơ drong tang găn pơm glăi mưh set hơ len tơ drong pơ jei băl vă pôk hơ păh.

Dơ̆ng: Tơ blơ̆