VOV4.Bahnar - Pơ gê ‘năr 24/3, Thủ tướng teh đak Phạm Minh Chính pơ gơ̆r Hop akŏm trực tuyến lơ̆m teh đak hăm anih jang mơ dro sa teh đak găh “ Hơ nơ̆ng tơ plih ‘nao, hơ tŏk ‘lơ̆ng iŏk yua tơ drong jang vă hơ vơn jên jang đơ̆ng anih jang mơ dro sa teh đak lơ̆m hơ tŏk tơ iung mŭk drăm - tơ pôl”. Pơ ma tơ̆ Hop akŏm, Thủ tướng tơ ƀôh hơ dăh, Hop akŏm pơ gơ̆r lơ̆m khei ‘năr teh đak tŏk bŏk jang kiơ̆ Tơ drong jang tơ iung ming mŭk drăm kiơ̆ dôm tơ drong tơ chơ̆t đơ̆ng Đảng, Kuôk hô̆i păng Khŭl kơ dră teh đak. Khŭl kơ dră teh đak hlôi păng tŏk bŏk jang kiơ̆ đei yua tơ drong kăl “ Pơm lăp sơ đơ̆ng, tơ tĕnh, vei lăng đei yua jĭ COVID-19”, pơm tơ drong ‘lơ̆ng tơ iung ming hrĕnh, hơ tŏk tơ iung kơ jăp mŭk drăm tơ pôl.

Khŭl kơ dră teh đak băt hơ dăh anih jang mơ dro sa teh đak vei anih jang tơm păng jing 1 khŭl jang gĭt kăl kơ mŭk drăm teh đak, tơ gop gĭt kăl sơ đơ̆ng mŭk drăm păng pơ trŭt hơ tŏk tơ iung mŭk drăm tơ pôl. Hơ dai hăm ‘noh, Thủ tướng tơ tă, Khŭl kơ dră teh đak kăl kơ pơ ma dơ nuh, tơ lĕch dôm trong vă jang, hơ năp jang, trong jang mă hơ dăh ăn rim anih tơm, anih jang păng tơ ring, rim grŭp jang, kŏng ti tơm, anih jang mơ dro sa teh đak vă đei hlôh vao trŏ ƀlep, trong jang lăp păng bơ̆ jang kơ tang, đei yua hloh.

Thuem: Tơ blơ̆