VOV4.Bahnar - ‘Năr 21/8, Thủ tướng Phạm Minh Chính pơ gơ̆r hop akŏm trư̆k tuyê̆n lơ̆m tĕh đak găh “Hơ tŏk tơ drong jang vei lăng jơ hngâm pran kon pơ lei; kơ chăng jang kiơ̆ ‘lơ̆ng, jang tơ iung ming hrĕnh, jang tŏk pran kơ jăp”. Hop akŏm đei pơ gơ̆r kiơ̆ trong pơ gơ̆r kơ tă tơ̆ hnam hôp lơ̆m Anih tơm vei lăng jang pơ gang, hăm anih pơih pơ dăh tơ̆ Dơ nŏ anih vei lăng kon pơ lei 63 dêh char, plt lơ̆m tĕh đak.

Thủ tướng Phạm Minh Chính pơ ma lơ̆m hop akŏm

Pơ ma lơ̆m hop akŏm, Thủ tướng athei đe kăn ƀô̆, bơ ngai jang pơ gang lơ̆m tĕh đak hơ nơ̆ng tưk tơ iung tơ drong juăt ‘lơ̆ng hơ iă, bơ̆ jang đei yoa dôm trong jang đơ̆ng Đảng, khôi luơ̆t tĕh đak, mă loi jĭ dôm tơ drong Tơ chơ̆t 20, 21 găh vei lăng, pơm hơ tŏk jơ hngâm pran ăn kon pơ lei păng vei lăng kơ sô̆ măt bơ ngai lơ̆m chăl ‘nao.

Thủ tướng pơ ma hơ dăh, tơ drong jang vei lăng jơ hngâm pran kon pơ lei ‘nŏh jĭ tơ drong jang tơm đơ̆ng anih jang pơ gang mă lei ‘nâu kŭm jing hơ năp jang atŭm đơ̆ng rim anih jang chinh trĭ. Dôm anih tơm, anih jang kơ pal athei hơ tŏk hlŏh dơ̆ng tơ drong jang hơ doi hăm Anih tơm vei lăng jang pơ gang, tơ̆ hơ năp dang ei ‘nŏh sek tơ lang ‘lơ̆ng dôm tơ drong kăl nhen răt tơ mam, tơ mât jên jang, kla jên khăm hơ met jĭ hăm ƀao hiêm y tê̆, tơ gŭm ăn kăn ƀô̆, bơ ngai jang pơ gang.

Dơ̆ng: Tơ blơ̆