VOV4.Bahnar - Pơ gê (1/3), tơ̆ Anih jang kơ Khul kơ dră tĕh đak, Thủ tướng Phạm Minh Chính pơ gơ̆r hop akŏm trư̆k tuyê̆n Khul kơ dră chĕp kơ̆l tĕh đak hăm dôm tơ ring, mơ̆ng nơ̆r tơ roi găh tơ drong tơ lĕch jang 5 tơ drong jang pơm trong gre tơm đei: Trong ver 4 Tơ ring Hà Nội; trong ver 3 plt Hồ Chí Minh; trong gre kơ dâu hrĕnh Châu Đốc-Cần Thơ- Sóc Trăng; trong gre kơ dâu hrĕnh Khánh Hòa- Buôn Ma Thuột; trong gre kơ dâu hrĕnh Biên Hòa - Vũng Tàu.

Tơ̆ hop akŏm, Thủ tướng Phạm Minh Chính pơ ma hơ dăh, 5 tơ drong jang pơm trong gre đei set hơ len năng ‘măng mă âu tơ tă trong gre gĭt kăl ngăl, jĭ trong gre tơ ƀưh dôm tơ ring jang mŭk drăm tih, dôm trong gre tơm tôch gĭt kăl tơ̆ dôm tơ ring, dêh char, plt... Tơ drong tơ lĕch man 5 tŏ trong gre âu ƀơm truh lơ tơ drong, lơ dêh char, plt păng lơ kon pơ lei. Yoa thoi nŏh Thủ tướng athei dôm bơ ngai tang măt vang hop akŏm tơ chĕng hơ len, set lăng mă tôm rim tơ drong vă gơ̆h đei jơ nei ‘lơ̆ng hlŏh.

Dơ̆ng: Tơ blơ̆