VOV4.Bahnar - Pơ gê ‘năr 3/8, Tơ̆ Anih bơ̆ jang kơ Khŭl kơ dră teh đak, Thủ tướng teh đak Phạm Minh Chính pơ gơ̆r ‘măng hop akŏm Khŭl kơ dră teh đak găh tơ drong mŭk drăm tơ pôl khei 7 păng 7 khei sơ năm 2022; tơ drong tơ lĕch jang kiơ̆ Tơ chơ̆t kơ sô̆ 01 đơ̆ng Khŭl kơ dră teh đak; tơ drong tơ lĕch jang Tơ drong jang tơ iung ming păng hơ tŏk tơ iung mŭk drăm - tơ pôl păng tơ drong jang tang găn jĭ covid-19. Pơ ma tơ̆ jơ hop akŏm, Thủ tướng Phạm Minh Chính pơ ma hơ dăh, khei 7 păng 7 khei âu ki mŭk drăm sơ đơ̆ng, vei lăng hơ tŏk kơ jă lơ, vei sơ đơ̆ng jang tŏk, vei sơ đơ̆ng dôm tơ drong dang ăi tih, tơ drong pơ truh bơ ngai jang tơ iung ming hrĕnh; sơ đơ̆ng chĭnh trĭ, sơ đơ̆ng tơ pôl, hiôk hian, pơm tơm hơ găt teh đei vei kơ jăp; tơ drong jang tơ bôl đei hơ tŏk.

Găh hơ năp jang khei 8 păng dôm khei đơ̆ng rŏng dơ̆ng, Thủ tướng pơ ma hơ dăh, tơ drong oei đei ƀôh mơ mat, ưh kơ băt hơ drol; băt hơ dăh ‘noh jĭ mơ mat tat, long nol lơ hloh kơ tơ drong hiôk; ưh kơ gơh pơm pơ hơi, băt hơ dăh hơ năp jang truh âu kơnh tôch kơ trăp trĭn; yua thoi noh kăl kơ akŏm tơ blang hơ dăh, hơ len lăng tơ drong lơ̆m păng ‘ngoăih teh đak mă ƀlep vă tơ lĕch dôm trong jang mă lăp.

Thuem: Tơ blơ̆