Tơ̆ jơ pơm lêh đei roi tơbăt tơdrong tơchơ̆t đơ̆ng Thủ tướng teh đak găh pơjing Anih jang kơ teh đak APEC 2027 đei 19 ‘nu bơngai jang, lơ̆m noh, Phó Thủ tướng, Kơdră tơm jang tơbôl Bùi Thanh Sơn pơm Kơdră vei lăng Anih jang kơ teh đak APEC 2027. Pơma tơ̆ lêh roi tơbăt, Thủ tướng Phạm Minh Chính akhan: ‘Nâu jĭ tơdrong gĭt kăl, tơƀôh hơdăh tơdrong năng kăl păng đon adrin đơ̆ng Việt Nam vă hơtŏk ‘lơ̆ng ăn tơdrong hơmet ăn sơnăm APEC 2027 – mĭnh tơdrong jang chinh trĭ, jang tơbôl tôch gĭt kăl hăm Việt Nam. 

Thủ tướng lui hăm tơdrong mât mĭnh jơhngâm đon, adrin păng bơ̆ jang pran ‘lơ̆ng đơ̆ng Việt Nam, hăm tơdrong tơgŭm đơ̆ng dôm teh đak vang jang hơdoi păng Khul Thư ký APEC, Sơnăm APEC 2027 gô jang đei jơnei ‘lơ̆ng hơiă, vang tơgop hơnhăk tơdrong jang hơdoi đơ̆ng APEC tŏk ‘lơ̆ng hlŏh dơ̆ng, pơm lăp hăm tơdrong hơmĕng đơ̆ng dôm teh đak păng tơgop ăn tơdrong rơngei, jang hơdoi, jang tŏk păng hơnŭk hơnoa tơ̆ châu Á - Thái Bình Dương păng apŭng plenh teh.