Roi tơbăt tơ̆ ‘măng hop akŏm, tang măt Anih tơm vei lăng găh Choh jang sa păng Cham char tơbăt lơ̆m giĕng âu ki hlôi tơlĕch ăn trong jang hơlen lăng, pơgơ̆r dôm khŭl bơ̆jang tơ̆ tơring; yak blŭng chă ƀôh, hơmet ming 1,2 hla ar hô sơ “ưh kơ sek phak” tam mă vei sơđơ̆ng lăng kiơ̆ trŏ luơ̆t, athei dăr hơlen, hơmet pơ ‘lơ̆ng kiơ̆ ƀlep tơdrong hơgăt. Găh vei lăng khŭl duk: đĭ đăng duk ka hlôi đei pơm hla ar, vei lăng bơ̆jang kiơ̆ tơnŏk. Tơdrong jang roi tơbăt găh hơdrin tang găn rôp yâu ka glăi luơ̆t IUU đơ̆ng Việt Nam hơnơ̆ng đei tŭn pran. Pơtôch ‘măng hop akŏm, Thủ tướng pôk pơ ư tơdrong hơdrin đơ̆ng rim Anih tơm, anih jang, tơring hlôi tơlĕch jang hơnơ̆ng, ‘lơ̆ng, hơnơ̆ng hơtŏk tơiung tơdrong jang ka hơdang kơjăp hai, tang găn rôp yâu ka glăi luơ̆t IUU hai.

Thủ tướng tơbăt, tơchĕng hơdrol Khŭl Dăr hơlen EC gô bơ̆jang tơ̆ Việt Nam lơ̆m khei 3, ‘nâu jĭ ‘măng hơlen lăng dăr lăng ‘măng mă 5. Thủ tướng pơma hơdăh: Tơdrong hơgăt ‘lơ̆ng hloh ‘noh jĭ vei lăng sơđơ̆ng hơtŏk tơiung kơjăp anih jang ka hơdang kơ Việt Nam kiơ̆ tơdrong hơtŏk tơiung atŭm tŏk 2 kơsô̆, hơdai hăm ‘noh athei pleh hŭt kơthe dreng IUU kiơ̆ pơtho akhan đơ̆ng EC. ‘Nâu jing tơdrong hơtŏk tơiung hrĕnh kơjăp kơ teh đak hai, jing chơt hơiă bưng ai kơ teh đak, kơ hơdrĕch hơdrŭng hai, jing pơvih pơvăn đei yua trŏ luơ̆t trŏ ƀlep đơ̆ng kon pơlei hai.