Vang truh jơ pơm lêh, Thủ tướng Lê Minh Hưng tôch kơ pơ ‘lơ̆ng păng ƀlŏk bơnê kơ dôm bơngai đĭ đei 80 sơnăm, 75 sơnăm păng 70 sơnăm dơ̆ng lơ̆m khŭl jang kơ Đảng. Thủ tướng pơma hơdah ‘nâu ưh khan lăp jing dôm tơdrong đei ƀôh găh khei ‘năr, mă jing tơdrong jang kơjung đơ̆ng tơdrong pơhrăm, plang pơyơ̆r păng jơhngơ̆m tơpăt ‘lơ̆ng hăm Đảng, hăm Teh đak, hăm Kon pơlei. Thủ tướng akhan, Quốc khánh 2/9 jĭ năr lêh tih kơ hơdrĕch hơdrŭng; ‘nâu jĭ ‘măng vang chhôk ‘nă lăng dơ̆ng jăl trong 81 sơnăm rơngei hiôk hian, pơgơ̆r kơdih, drơ̆ng 1 nơ̆r, pơjing, hơtŏk tơiung teh đak păng jơnei pran kơtang đơ̆ng tơdrong jang kach mang hloh 96 sơnăm hăm tơdrong chĕp kơ̆l đơ̆ng Đảng.

Lơ̆m tơdrong jang ‘noh hlôi chih ƀôh dôm tơdrong hŭt hơkâu, plang jơhngơ̆m đơ̆ng kơ jơhnơr bơngai Việt Nam, mă loi ‘noh jĭ dôm  đảng viên kră - dôm bơngai hlôi hrôih băt tơdrong ‘lơ̆ng kach mang, năm kiơ̆ Đảng đơ̆ng dôm khei sơnăm teh đak oei lơ mơmat tat, gleh hrat. Thủ tướng ‘meh rim đảng viên hăm tơdrong hlôh vao, đon hơgei păng bưng ai đơ̆ng kơdih, hơnơ̆ng bơngơ̆t truh, vang tơgop nơ̆r pơjing Đảng, pơjing khŭl kơdră teh đak; pơtho pơhrăm, pơlung kon sâu; tơroi dơ̆ng ăn kơ jơhnơr mơlôh jơhngơ̆m ‘mêm kơ teh đak, đon hơdrin kơdih, jơhngơ̆m đon jang tơnăp hăm tơpôl păng hơpơi ‘meh pơjing pơlei pơla, teh đak pơdrŏng pran.