Tơ̆ jơ lêh, Jơnŭm pơgơ̆r hlôi pơjao 4 hơpah A; 10 hơpah B; 12 hơpah C; 18 hơpah pơchhơ̆p jơhngơ̆m ăn dôm bơngai chih, grŭp chih mă đei tak phâm đei iŏk jơnei gah tang găn păng tơjră xa pơjĭp, huach kư̆ kă, pơm kơnê̆.

Năm akŏm păng pơjao tơmam hơpah, Thủ tướng teh đak bơ̆n Phạm Minh Chính lui ngeh: Hơpah ƀăo chĭ jơ̆p teh đak gah tang găn păng tơjră xa pơjĭp, huach kư̆ kă, pơm kơnê̆ gô hơnơ̆ng đei tơplih, pơlan să kơtang jơhngơ̆m pran pơm jang vă akŏm đon lui ăn rim bơngai jang ƀăo akŏm tơdrong hơgei po ăn tơdrong jang  tang găn păng tơjră xa pơjĭp, huach kư̆ kă, pơm kơnê̆; tơgop pơjing tơdrong jang ƀăo chĭ kăch mang gơh hơgei, dơnưp kiơ̆ trong jang 'nao; tơ-iung pơjing teh đak pơdrŏng jơnap, gơh hơgei lơ̆m chăl anglŏ sơnăm 'nao.