Tơroi hăm Thủ tướng tĕh đak păng Khul jang, Kơdră vei lăng kon pơlei dêh char Lâm Đồng Trần Văn Hiệp ăn tơbăt, sơnăm 2022 mă đơ̆ng oei đei lơ mơmat tat, pơlong nol, mă lei Đảng ƀô̆, khul kơdră pơgơ̆r păng kon pơlei dêh char Lâm Đồng hlôi mât 1 ƀơ̆r đon, adrin tôch ai păng jang đei lơ tơdrong ‘lơ̆ng hơiă, tôm tơdrong, pơhlom năng jang kĕh păng tŏk hlŏh nơ̆r hơgăt hăm đĭ đăng 18 tơ drong tơ chơ̆t jang atŏk tơiung mŭk drăm, tơpôl sơnăm 2022, lơ̆m nŏh jang hlŏh nơ̆r hơgăt hăm 6 tơdrong.

Dêh char Lâm Đồng apinh Khul kơdră tĕh đak, Thủ tướng tĕh đak, dôm anih tơm, anih jang kơ Trung ương găh 1,2 tơ drong ƀơm truh tơ drong ming man anih kăl nhen: tơgŭm dêh char man trong gre kơdâu hrĕnh Bảo Lộc – Liên Khương; jăh tơ lĕch tơdrong jang pơm trong gre kơdâu hrĕnh Nha Trang – Liên Khương, Liên Khương – Buôn Ma Thuột păng tơgŭm pơm 1,2 tŏ trong tơƀưh hăm dôm tơring nai.

Đơ̆ng rŏng mơ̆ng dôm nơ̆r pơma, iung pơma pơtôch jơ bơ̆ jang, Thủ tướng Phạm Minh Chính hơ iă, pôk pơ ư Đảng ƀô̆, khul kơdră pơgơ̆r, kon pơlei, anih tĕch mơdro kơ dêh char Lâm Đồng hlôi iŏk đei lơ̆m dôm sơnăm âu ki, mă loi jĭ lơ̆m sơnăm 2022 mŭk drăm, tơ pôl jang tŏk hrĕnh. Lơ̆m khei ‘năr truh âu kơnh, Thủ tướng athei Lâm Đồng hơtŏk tơdrong tơplih ‘nao trong jang tŏk kiơ̆ trong rơgei, đei yoa, tơmât yoa khoa hŏk ki thuơ̆t gơ̆h hơgei, mă loi jĭ lơ̆m dôm tơdrong pran ‘lơ̆ng nhen chă tơmang lăng, pơvih pơvăn, logistic, choh jang xa... adrin jing jơhngâm pran vă jang tŏk tơ̆ tơring Tây Nguyên păng lơ̆m tĕh đak.

Hơdrol ‘noh, Thủ tướng teh đak Phạm Minh Chính păng Khŭl bơ̆ jang kơ Khŭl kơdră teh đak năm ngôi tơ̆ Kŏng ti Dalat Hasfarm joăt vă pơm tơlĕch, tĕch tơ ‘mơ̆ng hơdrĕch, pơkao kăt dơng păng pơkao tăh lơ̆m ƀô̆i tơ̆ pơlei tơm Đà Lạt. Đơ̆ng rŏng vă jê̆ 30 sơnăm pơjing, đơ̆ng 1 hecta pơkao hồng păng 1 hecta cẩm chướng đei pơtăm lơ̆m dôm hơnih hnam kơmĭl hmă hăm kram blŭng a; dang ei Dalat Hasfarm hlôi tơplih jing ming man hnam kơmil tă kơ hăm pơsey păng pơih dơ̆ng dôm pơgar să hăm vă jê̆ truh 320 hecta; dang ei đei vă jê̆ 4.000 ‘nu jang hơnơ̆ng.

Rim sơnăm Dalat Hasfarm pơtruh ăn anih tĕch mơdro 15 teh đak, găh lơ ‘noh Nhật Bản, hăm akŏp kơjă đei vă jê̆ 60 triệu USD. Tơ̆ âu, Thủ tướng athei Dalat Hasfarm hơnơ̆ng pơih să tơmơ̆t jên jang lang să tơdrong jang tơ̆ dôm tơring ‘ngoăih anih kơdrơ̆m; hơnơ̆ng bơngơ̆t truh, vei lăng tơdrong arih sa tơmam drăm, jơhngơ̆m đon ăn bơngai jang; tơgop kŭm hăm tơring jang tơdrong jang vei lăng sơđơ̆ng tơdrong arih sa tơpôl.