Pơma tơ̆ hop akŏm, Thủ tướng Phạm Minh Chính akhan: Đơ̆ng dang ei truh Hop akŏm pơjei băl ‘mêm teh đak ‘măng mă XI oei pă 1 khei dơ̆ng, tơdrong jang tôch lơ, athei jang mă tơnăp, hơpơi ‘mĕh dôm bơngai jang lơ̆m Anih pơjei pôk hơpăh ‘măn jơ năr, jơhngâm đon rơgei bơ̆ jang ‘lơ̆ng tơdrong jang đei pơjao.

Pơma hơdăh tơdrong chă rơih pôk hơpăh hơnăn bơngai jang pran kơtang, Khul linh tơblăh kơtang nuih mơng kơ kon pơlei hăm dôm khul grŭp, rim bơngai jang đei jơnei ‘lơ̆ng hlŏh, jang rơgei đei đon ‘lơ̆ng nhen lơ̆m tơdrong jang tang găn jĭ Covid-19; vei lăng sơđơ̆ng teh đak; dôm tơdrong pơjei băl; tơmât jên atŏk tơiung anih jang gĭt kăl; sut pơđĭ hnam hiăh hiok; vei sơđơ̆ng tơdrong arih xa tơpôl; tơplŏng kơdâu, jŏh hơri hơxoang; tang găn, hơmet pơ ‘lơ̆ng hiong răm đơ̆ng ‘mi tih đak lơ̆p; jang khoa hŏk kơmăy kơmŏk; tơplih ‘nao rơgei, tơplih hăm kơmăy sô̆. Thủ tướng tơtă, ưh gơ̆h lon bơngai jang gơ̆h hơgei yơ păng pơma hơdăh "pôk pơ ư dôm bơngai jang rơgei, đei đon tơnăp ‘nŏh jĭ pôk pơ ư kơjă kăp gĭt kơ hơdrĕch hơdrung.”