Tơ̆ 'măng hop akŏm, rim bơngai tang măt hlôi tơgop nơ̆r gah dôm tơdrong chih akŏm luơ̆t, tơchơ̆t đei: Luơ̆t groi teh (hơmet tơplih); Luơ̆t Hnam oei (hơmet tơplih); Luơ̆t Tĕch răt teh hnam oei (hơmet tơplih); Luơ̆t Hơnih mong jên kơ teh đak (hơgrop hơdoi); Hơmet tơplih minh ƀar tơdrong tơchơ̆t lơ̆m Luơ̆t Asong jang; Luơ̆t pơm kiơ̆ pơkăp rơngei hiôk hian tơ̆ tơring (hơmet tơplih)...

Thủ tướng Lê Minh Hưng pơgơ̆r dah tenh kuăng keh đang tôm hla bar kăl kơ chih akŏm luơ̆t, tơchơ̆t păng ră hơdah tơdrong kăl jang păng iŏk yua tơnăp tơdrong kĕ đei; vei sơđơ̆ng tơdrong pơyua trŏ luơ̆t ăn kơ kon pơlei, hơnih jang mŭk drăm; hơtŏk jang 'lơ̆ng gah tơdrong vei lăng kơ teh đak. Adoi lơ̆m 'măng hop akŏm ou, Thủ tướng ră hơdah pơtoi pơgơ̆r, hơtŏk asong jang kơ teh đak, pơklaih dôm tơdrong tơnap tap tơhlăk tơhlĭn vă hơnhăk dôm tơdrong oei tơlăk gơh tơlĕch pơm jang. Atŭm hăm noh, pơtoi vei sơđơ̆ng mŭk drăm tơm, hơlen tang găn tơdrong huach kư̆ kă, vei sơđơ̆ng dôm tơdrong asong jang tih. Hơnih tơm Pơtho Pơhrăm athei sek tơlang mă kơtang tơdrong ưh kơ mah hla bar hŏk, vei sơđơ̆ng 'lơ̆ng tơmam drăm xa lơ̆m dôm hnam trưng hŏk.