Kơsơ năr 1/12, Thủ tướng Teh đak Phạm Minh Chính pơm tơm Hop akŏm Đảng ủy Khul kơdră chĕp pơgơ̆r teh đak pơtôch bơ̆ jang tang găn sa pơgơ̆m pơjĭp, pơhoach brăh brư, pơm tơdrong kơnê̆ jăl jang Hop akom tih mă XIII. Rim nơ̆r tơgop lơ̆m Hop akŏm pơma hơdăh tơdrong pơm keh đang ‘lơ̆ng dôm tơdrong tơchơ̆t; lơ tơdrong đei ƀôh sa pơgơ̆m pơjĭp, pơm tơdrong kơnê̆ kơtang hlôi đei ƀôh, dăr lăng hơlen, xek tơlang kơhret. Iung pơma pơrô̆ tơ̆ hop akŏm, Thủ tướng hôn bơnê dôm tơdrong jang ‘lơ̆ng hơ iă keh đang mă lei akhan oei đei dôm tơdrong tim mă ‘lơ̆ng nhen tơdrong mĭnh ƀar ‘nu kơdră chĕp pơgơ̆r, bơngai chĕp kơ̆l hơnih bơ̆ jang tim mă tơnăp; bơ̆ jang hơlen hơdăh dôm tơdrong jang lơ̆m hơnih jang tim mă ‘lơ̆ng hơ iă. Thủ tướng athei Đảng ủy Khul kơdră chĕp pơgơ̆r teh đak hơnơ̆ng xơkơt hơdăh tang găn hơlou, iung tơjră tang găn sa pơgơ̆m pơjĭp ‘noh tơdrong jang tơm hloh, tơklep hăm bơ̆ jang tơ iung pơjing, ming hơmet Đảng; atŏk kơtang tơplih ‘nao bơ̆ jang, pơm hơtŏk bơ̆ jang ‘lơ̆ng khul kang ƀô̆, đei jơhngơ̆m đon ‘lơ̆ng, oei sa ‘lơ̆ng, hơnơ̆ng lăng truh atŏk tơ iung kơtang.