Thủ tướng Phạm Minh Chính ‘nao pơm tơm ‘Măng hop akŏm Hơnih chĕp pơgơ̆r teh đak găh tang găn dăng rôp ka hơdang glăi, ưh kơ tơroi tơbăt păng ưh kơ pơm kiơ̆ tơdrong tơchơ̆t (IUU). Kiơ̆ nơ̆r tơbăt đơ̆ng Hơnih tơm vei lăng Choh jang sa păng Cham char, khei năr ou ki rim tơring tơter đak dơsĭ hlôi tơlĕch jang kiơ̆ lơ trong jang, iŏk đei jơnei hơ iă: duk ưh kơ gan ‘lơ̆ng sơđơ̆ng chă năm rôp ka hơdang hlôi tơjur, 80% duk rôp ka hơdang lơ̆m teh đak hlôi chih tơmơ̆t tôm kăn kươk kon pơlei kơ tơ-‘ngla duk lơ̆m kmăi kmŏk. Thủ tướng athei rim hơnih tơm, hơnih jang iung tơjră hăm trong chă rôp ka hơdang IUU, tơroi tơbăt pơtôch bơ̆ jang rim giĕng. Hơnih tơm vei lăng Choh jang sa păng Cham char kăl iung jang keh đang rim trong jang dăr lăng, ưh kơ lê̆ duk rôp ka hơdang năm tơ̆ đak dơsĭ mưh tim mă pơlăp kmăi kmŏk tơbăt hơdăh dăr lăng hơlen VMS. Hơnih tơm Ƀô̆ đô̆i vei lăng sơlam teh đak atŏk kơtang năm pơtrui, tang găn rim duk pơm glăi tơring đak dơsĭ teh đak đe, keh đang pơlăp kmăi kmŏk dăr lăng hơlen hơdrol kơ năr 30/10/2025.