‘Măng ‘mi kial pơrăm ou hôi pơrăm kơtang găh bơngai păng muk drăm, lơ jăl trong, hnam răm tơdrŭt hơlih, hư răm kơtang, pơm kơnê̆ kơtang truh tơdrong hơrih sa păng jang sa. Chih jô̆ ‘măng mă blŭng đei ƀpôh 42 ‘nu bơngai lôch păng hiong dong, 6 ‘nu bơngai rơka. Thủ tướng athei rim tơring đơ̆ng Nghệ An truh tơ̆ Quảng Ngãi atŭm hăm rim hơnih tơm ƀơm truh tơlĕch iung jang tĕnh koăng dŏng tơgum, vei lăng năng tông bơngai rơka, tơgŭm djru phe ƀa tơmam drăm sa, đak nhă, pơgang păng hơnih oei pơgia. Adoi teưnh koăng hơmet pơ ‘lơ̆ng trong hnam, chih jô̆ hơlen hiong răm dôm yơ păng tơroi tơbăt hơdăh hơdrol năr 3/11, tơ iung pơjing trong jang tơm pơtruh ăn Khul kơdră chĕp pơgơ̆r Teh đak hơdrol năr 8/11. Khul kơdră Teh đak hlloi tơgŭm djru 100 triu hlak jên đơ̆ng kon jên bơ̆ jang Trung ương sơnăm 2025 ăn pơlei tơm Huế vă hơmet pơ ‘lơ̆ng tơdrong hiong răm, sơđơ̆ng dơ̆ng kơjăp păng sơđơ̆ng tơdrong hơrih sa ăn kon pơlei.