Kơsơ̆ brei (01/10), Thủ tướng Phạm Minh Chính pơgơ̆r ‘Măng hop akŏm Khŭl kơdră teh đak vă hơlen lăng tơdrong bơ̆jang kiơ̆, hơnơ̆ng dăr hơlen, pơma dơnuh rim trong jang hơmet pơ ‘lơ̆ng pơmat tat, tơhlăk tơhlĭn lơ̆m tơdrong jang khŭl kơdră chĕp kơ̆l tơring 2 tăl. Pơma pơtôch ‘măng hop akŏm, Thủ tướng Phạm Minh Chính pơma hơdăh jơhngơ̆m đon ‘noh jĭ hơnơ̆ng bơ̆jang kơtang, hrơ̆ch păng đei yua hloh; jăh hơmet ‘lơ̆ng dôm tơdrong ưh kơ ‘lơ̆ng hrei ‘nâu; khŭl kơdră chĕp kơ̆l tơring 2 tăl athei đei bơ̆jang hrơ̆ch, drơ̆ng nơ̆r, hiôk, tôm tong, pơm lăp hăm tơdrong hơmĕng đơ̆ng Đảng, Teh đak păng Kon pơlei.

Thủ tướng akhan, khŭl bơ̆jang ‘nao athei ‘lơ̆ng hloh khŭl bơ̆jang so, tơdrong hơmet pơ ‘lơ̆ng hla ar bơ̆jang ăn kon pơlei, anih mơdro sa athei roi ‘năr roi ‘lơ̆ng hloh, mă loi ‘noh jĭ lơ̆m dôm tơdrong jang: teh, proh hơmet tĕh, jên hu, mŭk tơmam, ming man, trong nơnăm, jang pơgang, pơtho pơhrăm..., jang pơkeh hơnih chih răk hla ar kăl păng tơklep, jang hơdai hăm khŭl jang roi tơbăt hơmet pơ ‘lơ̆ng hla ar bơ̆jang đơ̆ng dôm anih tơm, anih jang păng tơring. Tơ̆ ‘măng hop akŏm Thủ tướng tơƀôh rơđăh, dang ei oei 31 rơbâu ‘nu bơngai pơdơh kơ jang tam mă đei kla jên tơgŭm; athei pơm rơđăh yua đơ̆ng kiơ, khan lê̆ kơ anih jang hơyơ đei jên, đei tơchơ̆t bơih mă ưh kơ kla jên. Thủ tướng athei jang pơtôch tơdrong kla jên tơgŭm ăn kang ƀô̆ pơdơh kơjang hơdrol kơ ‘năr 10/10/2025.