VOV4. Bahnar - Thủ tướng Tĕh đak Phạm Minh Chính ‘nao pơtrŭh nơ̆r tơchơ̆t găh tơ iung pơjing trong jang plôih ‘măng sơđơ̆ng, khoa hŏk, jơnei sơng hơvơn tơmoi tơmang pơ hiơ̆ apŭng plĕnh tĕh. Kiơ̆ kơ ‘nŏh, Thủ tướng athei Dơnŏ anĭh tơm vei lăng Jŏh ayŏ, Đă ƀŏng lŏng tơplŏng kơdau păng Tơmang pơ hiơ̆ pơm tơm, iung jang hơdoi hăm rim Hơnĭh tơm: Hơnĭh jang pơgang, Ƀô̆ đô̆i vei lăng sơlam tĕh đak, Kŏng ang, Hơnĭh jang tơbôl, Dơnŏ anĭh vei lăng trong gre nơnăm, Hơnĭh vei lăng jang kơtơ̆ng ang păng Pơre nơ̆r, rim hơnĭh tơm, hơnĭh bơ̆ jang ƀơm trŭh păng rim tơring tơ iung pơjing păng tơlĕch jang kiơ̆ trong pơ prŏ jang, trong jang plôih ‘măng bơ̆ jang tơmang pơ hiơ̆ apŭng plĕnh tĕh sơđơ̆ng, khao hŏk, jơnei. Dơnŏ anĭh vei lăng kon pơlei rim dêh char, pơlei tơm găh Trung ương iung jang hơdoi hăm Dơnŏ anĭh tơm vei lăng Jŏh ayŏ, Đă ƀŏng lŏng tơplŏng kơdau păng Tơmang pơ hiơ̆, Dơnŏ anĭh vei lăng jang pơgang păng rim hơnĭh tơm, hơnĭh bơ̆ jang ƀơm trŭh, tơ iung pơjing, tơlĕch jang kiơ̆ trong pơ prŏ jang hơdăh vă pơgơ̆r jang kiơ̆; hơmet ăn găh tơdrong jang pơgang, khul jang, tơmam drăm, tơlĕch trong jang hơdăh, sơđơ̆ng ăn tang găn jĭ hơbŭh păng hơmet pơ ‘lơ̆ng tơdăh đei tơdrong sar bar.

Tơblơ̆ nơ̆r: Amazưt