VOV4.Bahnar - Kơsơ̆ năr 24/1, Thủ tướng tĕh đak hăm khŭl bơ̆ jang hlôi, sŏh hlôt nhang, glơng ‘măn gơvang pơkao tơ̆ hnam ƀlŏk hơdơ̆r Kơdră chĕp pơgơ̆r Tĕh đak Hồ Chí Minh, sŏh hlôt nhang, ‘măn gơvang pơkao tơ̆ hơnĭh man tơbăt ăn bơngai nuih mơng hơdrĕch hơdrung Lê Lợi tơ̆ pơlei tơm Thanh Hoá; trŭh năm ngôi păng hmach Têt ăn kang ƀô̆, khŭl kŏng ang kơ Kŏng ang dêh char Thanh Hóa, Thủ tướng hơlen hơdăh: Tơdrong lơ̆m sơnăm 2022 oei tôch tơnap tap, kơ yuơ lơ lŏh bơ̆n ư̆h kơ gơ̆h pơhơi, hơmet ăn tôm jơhngơ̆m đon, mŭk drăm, khŭl jang, chĕp pơgơ̆r, pơrô̆ jang, pơgơ̆r iung jang ‘lơ̆ng hloh dơ̆ng kơ sơnăm au ki. Thủ tướng pơma hơdăh, tơdrong jang kăl hlŏh ‘nŏh hơdrin đĭ jơhngơ̆m vang tang găn jĭ hơbŭh, lơ̆m au, kăl akŏm ăn tơdrong jang ƀet vaccine, khŭl kŏng ang atŭm hăm rim khŭl anai kăl “yak trŭh rim koeng, kơleng rim unh hnam, năm dăr joang rim bơngai” vă ƀet vaccine ăn kon pơlei. Thủ tướng athei Kŏng ang dêh char Thanh Hoá hơnơ̆ng băt hơdăh tơdrong, hơnơ̆ng jang tơgŭm ăn kơdră chĕp pơgơ̆r đảng, kơdră chĕp pơgơ̆r pơlei tơm pơrô̆ iung jang; jang ‘lơ̆ng bơ̆ jang vei lăng sơđơ̆ng, pơrô̆ pơrôp, tơroi tơbăt, pơgơ̆r jang kiơ̆ ‘lơ̆ng, vei lăng sơđơ̆ng dơ̆ng tĕh đak, vei lăng tơdrong erĭh sa sơđơ̆ng dơ̆ng kơ jăp ăn kon pơlei.

Tơblơ̆ nơ̆r: Amazưt