Hăm jơhngâm đon kŭp yom, 'mêm kơ eng, Khul jang đơ̆ng Trung ương 'măn 1 pơnĭt ƀlŏk hơdơ̆r păng tơƀôh jơhngâm đon 'mêm bơnê kơ 192 'nu linh lôch tang ăn teh đak đei ƀŭ hơmet tơ̆pơsat 'nâu. Thủ tướng păng khul jang tơƀôh jơhngâm đon 'mêm hơmach, hmach bơnê păng ling lang chĕp răk kŏng tih tên đơ̆ng đe linh lôch tang ăn teh đak hlôi plang pơyơ̆r, chu hŭt hơkâu lôch tang yoa tơdrong jang kăch mang đơ̆ng Đảng, đơ̆ng hơdrĕch hơdrung.

Chĕp kơjăp tơdrong juăt "Nhă đak ƀlŏk kơtu", "Tơgŭm ăn bơngai đei kŏng", Đảng, teh đak păng kon pơlei bơ̆n hơnơ̆ng 'măn tơdrong tơrĕk tôch dêh hăm bơngai đei kŏng; hơnơ̆ng pơngơ̆t truh tơdrong arih xa găh tơmam drăm păng jơhngâm đon kơ đe linh jĭ rơka, linh jĭ jăn, kơtum kơtŏng linh lôch tang ăn teh đak păng bơngai đei kŏng; atŭm hăm 'nŏh, hơnơ̆ng vei kơjăp păng tưk tơiung tơdrong juăt 'mêm kơ teh đak, hơmet kơjăp đon jang kăch mang, tưk tơiung jơhngâm hơpơi 'mĕh plang pơyơ̆r, pơjing păng vei lăng kơjăp 'lơ̆ng teh đak ăn rim jơhnơr hrei 'nâu păng ning mônh kơnh./.