VOV4.Bahnar - Pơ gê 22/7, Thủ tướng Phạm Minh Chính sơng ƀok Maeda Tadashi, Kơ dră chĕp kơ̆l Khul vei lăng Anih mong jên jang hơ doi hăm apŭng plenh tĕh kơ Nhật Bản (JBIC). Tơ̆ jơ sơng, Thủ tướng pơ ma hơ dăh Việt Nam ling lang năng Nhật Bản jĭ tĕh đak jang hơ doi gĭt kăl tơm, đunh đai, tơ gŭm ăn Nhật Bản tơ gop roi ‘lơ̆ng ăn tơ drong rơ ngei, jang hơ doi păng jang tŏk tơ̆ tơ ring păng lơ̆m apŭng plenh tĕh, hơ nhăk tơ drong pơ vei 2 tĕh đak mât lơ̆m chăl jang tŏk ‘nao năm truh ‘măng tơ băt 50 sơ năm pơ jing tơ drong pơ vei, jang tơ bôl lơ̆m sơ năm 2023.

Thủ tướng pơ ma hơ dăh, 1 lơ̆m dôm tơ drong tơ gŭm tơm đơ̆ng 2 tĕh đak ‘nŏh hơ tŏk tơ drong pơ vei găh mŭk drăm, tang găn kơ jă tơ mam tŏk, hơ met pơ ‘lơ̆ng anih  tơ mât jên jang xa, tĕch mơ dro… Tơ̆ hơ năp kơnh, kiơ̆ jơ hngâm đon “‘mêm băt, tơ păt ‘lơ̆ng, lui ngĕh, đei yoa”, Thủ tướng athei Nhật Bản păng JBIC hơ nơ̆ng roi tơ ƀôh, jang tơ gŭm hăm Khul kơ dră tĕh đak păng Kuô̆k hô̆i Nhật Bản; hơ nơ̆ng pơ ma nuh păng jang hơ doi kơ jăp hăm dôm anih jang kơ Việt Nam vă chă trong jang hơ doi đei yoa ‘lơ̆ng, tưk tơ iung hlŏh dơ̆ng tơ drong pơ vei, jang hơ doi gĭt kăl Việt Nam - Nhật Bản lơ̆m chăl ‘nao.

Dơ̆ng: Tơ blơ̆