Kơsơ̆ năr 31/10, Thủ tướng Phạm Minh Chính sơng pơmá dơnŭh hăm ƀok Kasper Rorsted, Kơdră chĕp pơgơ̆r Grŭp jang Adidas tŏk bŏk đei ‘măng năm tơmang păng bơ̆ jang tơ̆ Việt Nam. 

Thủ tướng Phạm Minh sơng pơma dơnŭh hăm Kơdră chĕp pơgơ̆r Grŭp jang Adidas

Thủ tướng hôn bơnê kơ Adidas hơnơ̆ng rơ̆ih iŏk Việt Nam ‘nŏh tĕh đak kăl păng gĭt kăl hlŏh lơ̆m tĕch mơdro tơmam drăm kơ grŭp au. Khŭl kơdră tĕh đak Việt Nam gô hơnơ̆ng hơmet pơ ‘lơ̆ng trong jang tơmơ̆t jên jang, mơdro sa, hơmet pơ ‘lơ̆ng tơdrong jang pơm hla bơar, ling lang lăng ba, pơjing rơvơn vă rim bơngai tơmơ̆t jên jang pơma atŭm hăm Adidas pơma hơdrô̆ vei kơ jăp, pơ̆ih să păng atŏk tơ iung tơ Việt Nam. Thủ tướng athei Adidas hơnơ̆ng pơ̆ih să pơm tơlĕch tĕch mơdro tơ̆ Việt Nam-mĭnh tơring kăl, đunh đai, kơjăp ‘lơ̆ng kiơ̆ trong tơlĕch jang đơ̆ng Grŭp jang, adoi tơgŭm djru, pơjing tơvơn ăn roi năr roi đei lơ hơnĭh mơdro sa Việt Nam đei iung jang lơ̆m rim tơdrong jang hơnhăk đei iŏk yua kơ jăp lơ̆m pơm tơlĕch tĕch mơdro lơ̆m apŭng plĕnh tĕh kơ Adidas. Ƀok Kasper Rorsted tơbăt, dôm tơdrong tĕch mơdro iok đei jơnei tơ̆ Việt Nam, tơbăt Adidas gô hơnơ̆ng atŏk lơ tơmam vă pơm tơlĕch tơ̆ Việt Nam adoi nhen atŏk ‘lơ̆ng pơm tơlĕch tơ̆ Việt Nam, tơmơ̆t lơ hlŏh dơ̆ng lơ̆m akŏp tơmam drăm tĕch mơdro  lơ̆m apŭng plĕnh tĕh kơ Grŭp jang au.