VOV4.Bahnar – Pơma ăh Lêh tơbăt 'năr Bơngai jang tĕch pơdro Việt Nam 13/10 păng pôk pơ ư Bơngai jang tĕch pơdro Việt Nam gơh rơgei pơgơ̆r ăh pơgê năr 12/10, Thủ tướng teh đak bơ̆n Phạm Minh Chính pơtruh nơ̆r thơ thâu 'lơ̆ng hơ iă hloh hăm jơnŭm jang mŭk drăm, khul bơngai jang tĕch pơdro Việt Nam, thơ thâu hăm jơnŭm jang mŭk drăm, khul bơngai jang tĕch pơdro Việt Nam roi năr roi hơtŏk pran kơtang, pơtoi tơgop lơ hloh dơ̆ng lơ̆m tơdrong tơ iung pơjing teh đak Việt Nam pran kơtang. Dang ei Việt Nam hlôi đei jê̆ 900 rơbâu anih jang mŭk drăm tŏk bŏk oei pơm jang. Khul jang tĕch pơdro lơ̆m jâ̆p teh đak truh dang ei hlôi tŏk truh rơtuh bơngai. Tơdrong jang mŭk drăm tơgop hloh 60% GDP, pơhlom 30% kơsô̆ bơngai tŏk bŏk oei pơm jang.

Pơma ăh jơ lêh, Thủ tướng Phạm Minh Chính xơkơ̆t, Khul kơpal teh đak gô pơtoi chih akŏm keh đang trong pơkăp pơma đam, hơnơ̆ng yak hadoi, tơmơ̆ng, tơroi, xek tơlang dôm tơnap tap, tơhlăk tơhlĭn, pơtruh đơ̆ng anih jang mŭk drăm. Găh anih jang mŭk drăm, bơngai jang tĕch pơdro Việt Nam Thủ tướng 'meh vă rim bơngai jang jang tĕch pơdro pơtoi hơtŏk tơdrong tơgar lơ̆m pơm tơlĕch tĕch tơmam drăm po, tơgop hơtŏk mŭk drăm – tơpôl teh đak. 

 Tơ̆ lêh pôk bơnê Thủ tướng teh đak Phạm Minh Chính hlôi hơpăh ăn 10 'nu bơngai jang tĕch pơdro Việt Nam gơh rơgei hloh Việt Nam xơnăm 2022, Jơnŭm pơgơ̆r hlôi pơjao ăn 6 'nu jang rơgei tơgop lơ lơ̆m tơdrong tang găn păng tơjră pơrang jĭ covid-19 păng pôk ăn 60 hơnăn kơ bơngai tĕch pơdro Việt Nam gơh rơgei xơnăm 2022.

VOV/Lan tơblơ̆