Phŏ Thủ tướng Vũ Đức Đam, Ƀô̆ trưởng Joh ayŏ Tơplŏng kơdâu păng Tơmang pơhiơ̆ Nguyễn Văn Hùng atŭm pơgơ̆r hop akŏm. Atŭm năm akŏm đei Kơdră kơ dôm anih jang păng đei chô̆ tơroh trư̆k twê̆n hăm 63 dêh char pơlei tơm lơ̆m jâ̆p teh đak.

Đơ̆ng khei 3/2021, Việt Nam hlôi pơih dơ̆ng dôm tơdrong jang tơmang pơhiơ̆. Mă pơih 'măng xơng tơmoi đơ̆ng teh đak đe hrôih hloh pơtêng hăm lơ teh đak lơ̆m tơring mă lei tơdrong iŏk yua trong hiôk âu vă hơtŏk oei tơjruh, tam mă hơvơn đei lơ tơmoi kơjung hloh; kơsô̆ tơmoi đơ̆ng teh đak đe năm truh Việt Nam tam mă nhen tơdrong hơpơi 'moih, pơtơm đei pơhlom 42% pơtêng hăm tơdrong tơlĕch jang. Pơma ăh hop akŏm, Thủ tướng Phạm Minh Chính ră hơdăh, tơmang pơhiơ̆ jing minh tơdrong jang mŭk drăm kăp gĭt, tơgop roi năr roi tih hăm mŭk drăm kơ lơ teh đak; pơkăl athei đei đon kơchĕng 'nao, trong tơrĕk jang 'nao, kiơ̆ pơkăp “Tơroi tơbang dôm tơdrong jang tơmang pơhiơ̆ mă tơmoi kăl, ưh kơsĭ adrô̆ tơdrong kiơ mă bơ̆n hlôi đei”.