Pơma pơgơ̆r hop akŏm, Thủ tướng ră hơdah đơ̆ng đei pơjing Jơnŭm pơgơ̆r tơdrong ming man trong gre treng đei hơtŏk kăp gĭt, vei sơđơ̆ng tôm tong păng đei jơnei kơjung hloh. Thủ tướng pơgơ̆r rim hơnih jang tơm, rim tơring iŏk yua sơnong jang tơm, pơ̆n tơchĕng pơ̆n pơm jang, akŏm pơklaih tơhlăk tơhlĭn vă hơtŏk ming man trong gre treng.

Hăm jăl Lào Cai – Hà Nội – Hải Phòng, athei hơtŏk tenh dôm tơdrong kăl keh đang chih akŏm tơdrong gơh jang, vă pơtoi pơm gơng găn sơlam teh păng jang tơnăp dôm tơdrong hrŭ 'mong iŏk teh ming man, asong hơnih oei xa. Hăm jăl trong kơdou hrenh Tu – Pơbah păng dôm jăl trong tơ̆ tơring kơdrơ̆m tơ̆ Hà Nội, pơlei tơm HCM atŭm hăm minh ƀar jăl trong tơroh tơring, Thủ tướng athei chih akŏm tơdrong jang hơdah, tơlĕch trong jang tenh vă vei sơđơ̆ng tơdrong ming man drơ̆ng minh.