Kiơ̆ dôm tơdrong tơroi, nơ̆r pơtruh ah hop akŏm, tơdrong tơblah tơ̆ Trung Đông pơtoi tŏk kơtang tơnap kơ hơlen băt, tơrĕk truh tơdrong asong păng kơjă unh hơyuh lơ̆m kơpal teh, lơ̆m noh đei Việt Nam. Sơnong jang lơ̆m khei năr truh, Thủ tướng teh đak pơgơ̆r ưh gơh kơƀah tơdrong asong đak dou đak xăng, ưh đei lê̆ tơhlăk tơhlĭn lơ̆m pơm jang, tĕch pơdro, ưh đei lê̆ tơsŭl tơsăl lơ̆m tơpôl. Thủ tướng teh đak tơrĕk hăm dôm tơdrong jang pơm tơlĕch, tĕch mơdro đak xăng đak dou athei mă sơđơ̆ng, nĕ kơ vei tơmam drăm, hơtŏk kơjă, akŏm mong pơm tơsŭl tơsăl tơdrong tĕch răt, rim hơnih jang đei tơrĕk vang jang vă tang găn tơdrong tĕch răt tơtông tơ̆ tơring sơlam, khŏm mă sek tơlang kơjăp vă tang găn dôm tơdrong pơm glăi.  

Gah đunh khei năr, Thủ tướng teh đak pơgơ̆r hăm Hơnih tơm Kŏng thương athei jang hơdoi hăm rim hơnih jang tơm, hơnih jang hơlen chă dôm trong jang vă dah hrôih hơtŏk tơdrong pơm tơlĕch unh hơyuh lơ̆m teh đak, nhen pơtoi asong mah păng hơtŏk tơdrong kơchăng đei đak xăng đak dou. Pơtoi hơlen dôm hơnih tĕch răt đak xăng đak dou; hơtŏk tơdrong mong đei unh hơyuh kơ teh đak, pơm trŏ tơdrong kăl vei mah unh hơyuh lơ̆m đunh khei năr.