Đơ̆ng rŏng kơ lêh xơng kăp gĭt, ƀar thủ tươ̆ng hlôi tơlĕch pơma đam. Ăh jơ pơma đam, Thủ tươ̆ng teh đak bơ̆n Phạm Minh Chính chơt hơ iă 'măng mă blŭng năm tơmang truh teh đak Luxembourg, bơnê kơ tơdrong xơng drơ̆ng kăp gĭt păng tơnăp đơ̆ng Khul kơpal teh đak Luxembourg 'măn ăn kơ Khul Kơpal.

Thủ tươ̆ng xơkơ̆t Việt Nam hơnơ̆ng lăng tơgĭt tơdrong jang tơbôl tôm tơdrong hăm Luxembourg, teh đak vang jang lơ̆m tơdrong hơtŏk rơgei, đei xơnong kăp gĭt kơ Jơnŭm châu Âu (EU). Xơng hmach kơ Thủ tướng teh đak bơ̆n Phạm Minh Chính năm tơmang teh đak Luxembourg, 'măng năm tơmang kơpal mă blŭng đơ̆ng rŏng 10 xơnăm đơ̆ng 2 teh đak, Thủ tướng Xavier Bettel hmach bơnê kơ tơdrong kăp gĭt đơ̆ng 'măng năm tơmang, tơƀôh tơdrong lui ngeh 'măng năm tơmang gô hơtŏk tơdrong tơbôl kơ 2 teh đak yak ăh jăl hơtŏk tơ iung 'nao.

Ƀar Thủ tướng ră hơdăh tơdrong kăp gĭt kơ tơdrong tơlĕch jang đei jơnei lơ̆m pơkăp jang hadoi hlôi đei, atŭm hăm noh hơlen pơjing trong jang hadoi 'nao hăm mŭk drăm, tơdrong kăl hơtŏk tơ iung kơ 2 teh đak. Ƀar păh drơ̆ng nơ̆r hơtŏk hrôih pơkăp jang hadoi găh jên hu jơk, vă iŏk yua tơdrong pran kơ teh đak Luxembourg găh jên axong jang, mă hăt noh găh jên hu jơk, vă tơgŭm ăn Việt Nam iŏk jang Pơkăp kơ teh đak găh hơtŏk tơ iung jơk păng kơ 'nôh tơjră hăm hơyuh tô̆ 'mi tơplih, lơ̆m noh đei tơdrong pơm kiơ̆ pơkăp hlôi đei tơbang ăh COP 26.