Tơ̆ jơ sơng, Thủ tướng Phạm Minh Chính ră hơdah Việt Nam tơplih 'nao gah trong pơkăp hơtŏk tơ-iung, lơ̆m noh athei hơtŏk tenh păng kơjăp sơđơ̆ng; gơnơm lơ̆m khua hŏk kơmăi kơmŏk 'nao, tơplih 'nao gơh hơgei, tơplih kơmăi kơsô̆; hơtŏk mŭk drăm jơk, mŭk drăm sơđơ̆ng, mă kăl noh hơtŏk gah tơdrong jang bán dẫn.

Thủ tướng pơtruh nơ̆r hăm Jơnŭm jang mŭk drăm bán dẫn apŭng plenh teh păng dôm anih vang jang hơtŏk jang hơdoi hăm dôm anih jang Việt Nam lơ̆m tơdrong tơlĕch jang gah kơmăi kơmŏk kăp gĭt, mă kăl noh jang hơdoi gah hơtŏk bơngai jang gah tơdrong jang bán dẫn, pơtho gah tơdrong gơh jang, tơgŭm Việt Nam pơjing khul juăt jang păng kih sư gơh hơgei lơ̆m apŭng plenh teh pơtrŏ hăm tơdrong pơkăp kơ tơring. Jơnŭm pơgơ̆r teh đak Việt Nam sơkơ̆t hơdah, khŏm mă hơtŏk kơtang tơdrong jang kŏng ngĭp bán dẫn, jang kiơ̆ pơkăp hơ-'nhăk Việt Nam jing anih tơm kăp gĭt lơ̆m tơdrong asong bán dẫn lơ̆m apŭng plenh teh.