VOV4.Bahnar - Kơ sơ̆ ‘năr 9/9, Thủ tướng Phạm Minh Chính sơng ƀok Kơ dră vei lăng Anih jang kơ Thủ tướng Lào Alounxai Sounnalath năm hơ pong, bơ̆ jang tơ̆ Việt Nam păng vang pơ gơ̆r hop akŏm pơ ma nuh, roi tơ băt dôm tơ drong kăl hăm Anih jang kơ Khul kơ dră tĕh đak Việt Nam lơ̆m tơ drong jang tơ gŭm, pơ vih pơ văn ăn Khul kơ dră tĕh, Thủ tướng tĕh đak.

Thủ tướng tĕh đak sơng Kơ dră vei lăng Anih jang kơ Thủ tướng Lào

Tơ̆ jơ sơng, Thủ tướng athei tơ̆ hơ năp kơnh, 2 anih jang tơ lĕch jang đei yoa ‘lơ̆ng Hla ar chih tơ băt găh Trong jang hơ doi đơ̆ng 2022-2023; hơ nơ̆ng jang hơ doi, tơ gŭm băl, pơ ma nuh truh dôm tơ drong kăl mưh bơ̆ jang păng tơ lĕch jang ‘lơ̆ng dôm tơ drong jang hơ doi, roi đunh roi đei yoa hlŏh dơ̆ng vă roi tơ ƀôh, tơ gŭm ăn Khul kơ dră tĕh đak, Thủ tướng 2 tĕh đak chĕp kơ̆l pơ gơ̆r.

Ƀok Kơ dră vei lăng Anih jang kơ Thủ tướng Lào pơ ma hơ dăh, Lào ling lang năng kăl, hơ pơi ‘mĕh vei kơ jăp, tưk tơ iung păng pơm hơ tŏk tơ drong pơ vei ‘lơ̆ng hơ iă păng tơ guăt 1 ƀơ̆r đon gĭt kăl Lào-Việt Nam, akhan vă adrin tơ lĕch jang dôm nơ̆r pơ tho, tơ drong drơ̆ng nơ̆r đơ̆ng kơ dră chĕp kơ̆l tih kơ 2 tĕh đak, tơ gop pơm hơ tŏk tơ drong pơ vei tơ guăt 1 ƀơ̆r đon mă Đảng, tĕh đak păng kon pơ lei 2 tĕh đak hlôi hŭt kơ băt dôm yơ jơ hngâm tơ iung pơ jing, hơ met ming roi đunh roi ‘lơ̆ng păng đei yoa tơ̆ rim tơ drong jang, hơ nhăk tơ drong đei yoa ‘lơ̆ng ăn kon pơ lei 2 tĕh đak.

Dơ̆ng: Tơ blơ̆