Ƀơ̆t pơ gê ‘năr 8/11, tơ̆ Cung Hòa Bình anih tơm Phnom Penh, Thủ tướng teh đak Campuchia Samdech Techo Hun Sen pơgơ̆r pơm lêh sơng Thủ tướng Phạm Minh Chính păng Khŭl tang măt gĭt kăl Việt Nam năm ngôi, bơ̆ jang tơ̆ teh đak Campuchia. Đơ̆ng rŏng kơ pơm lêh sơng, 2 Thủ tướng pơgơ̆r pơma đam. Hơdrol ‘noh, lăp đơ̆ng rŏng kơ truh tơ̆ Campuchia, Thủ tướng Phạm Minh Chính hlôi năm dan pơ kao tơ̆ Hơnih man Rơ ngei, Rup man nhap ƀok pơtao teh đak Norodom Sihanouk, Hơnih man tơ bôl Việt Nam-Campuchia tơ̆ anih tơm Phnom Penh.

Lơ̆m tơdrong jang năm ngôi, bơ̆ jang tơ̆ Campuchia, đơ̆ng rŏng kơ Thủ tướng Phạm Minh Chính pơma đam hăm Thủ tướng Campuchia; Thủ tướng Phạm Minh Chính gô năm kơ kuh kơ ƀok pơ tao teh đak Campuchia Norodom Sihamoni; pơma dơnuh hăm Thượng viện Campuchia Say Chhum; pơma dơnuh hăm Kơdră Kuôk hô̆i Campuchia Heng Samrin. ‘Măng năm ngôi, bơ̆ jang lơ̆m “Sơnăm tơbôl Việt Nam - Campuchia 2022” tơgop hơtŏk tơiung tơdrong pơ vei teh đak tơ jê̆ ‘lơ̆ng hơiă, tơbôl joăt joe, jang hơdai tôm tong, kơ jăp đunh đai đơ̆ng 2 teh đak.