Hop akŏm yua đơ̆ng Khŭl kơdră teh đak Hàn Quốc jang hơdai hăm Anih vei lăng jang pơgang apŭng plĕnh teh (WHO) pơgơ̆r vă vang tơ roi băl dôm đon tơ chĕng, dôm trong vă jang păng kơ măy kơ mŏk ‘nao lơ̆m anih jang kơ măy kơ mŏk vắc-xin păng y sinh. Lơ̆m ƀai iung pơma đơ̆ng kơ dih, Thủ tướng Phạm Minh Chính pơ ma hơ dăh, jĭ hơ buh Covid-19 đei ƀôh hlôi ƀơm ưh kơ ‘lơ̆ng kơ tang, tôm tong truh rim teh đak.

Thủ tướng Phạm Minh Chính pơ ma tơ̆ hop akŏm

Lơ̆m tơ drong jang tơ jră jĭ hơbuh âu ki, bơ̆n roi ƀôh rơđăh hloh tơdrong gĭt kăl đơ̆ng vắc-xin. Việt Nam hlôi pơ gơ̆r dôm trong jang tang găn jĭ, lơ̆m noh, Việt Nam hlôi tơlĕch jang jơ nei jang tơ bôl vắc xin păng Tơdrong jang ƀet bơ̆ng đĕch tih hloh đơ̆ng sơ̆ truh dang ei. Thủ tướng pơ ma hơ dăh, Việt Nam jĭ teh đak jang lơ̆m khŭl ‘lơ̆ng, jang tơ năp hăm tơ pôl apŭng plĕnh teh, Việt Nam pơkăp jang hơdai kơ jăp, đei yua lơ̆m tơchĕng hơlen, pơm tơlĕch, pơ jao kơmăy kơmŏk, tơ gop sơđơ̆ng tơdrong pơ truh vắc-xin păng dôm tơmam y sinh lơ̆m jơ̆p plei teh.