Thủ tướng athei Anih tơm vei lăng Ming man, Kŏng ti tơm Cham gre păr Việt Nam păng dôm anih jang ƀơm truh dăr hơlen akŏm tơdrong jang, hơtŏk loi dơ̆ng bơngai jang, tơmam, pơgơ̆r bơ̆ jang 3 ‘măng, 4 khŭl vă vei sơđơ̆ng tơdrong hơgăt tơlĕch ăn. Chih iŏk tơdrong hơdrin đơ̆ng dôm bơngai iŏk jang lơ̆m tơdrong mơnat tat găh tơmam ming man, Thủ tướng pơma hơdăh ‘nâu jĭ tơdrong jang tơm kơ teh đak, kăl kơ hơnơ̆ng hơtŏk ‘lơ̆ng păng đei yua bơ̆jang.

Thủ tướng hôn bơnê tơdrong jang đang Hơnih vei lăng găh păr, trong păr tŏk, jur păng cham pơdơ̆ng gre păr; hnam tơmoi gô vă păr. Hơdai hăm athei dăr hơlen ƀơm truh tơmam ming man, đak xăng đak dâu. Thủ tướng kŭm athei dôm anih tơm, anih jang ƀơm truh dôm tơdrong jang hơnơ̆ng tơlĕch iŏk jang Tơdrong jang 3 Cham gre păr apŭng plĕnh teh Long Thành.