‘Măng hop akŏm hlôi pơma dơnuh găh tơdrong pơm pơkeh 3 tơdrong vă pơjing khôi luơ̆t: Khôi luơ̆t Groi teh hơmet ming, Khôi luơ̆t Hnam oei păng Khôi luơ̆t Tĕch răt teh hơmet ming. Thủ tướng pơma hơdăh, 3 tơdrong vă pơjing khôi luơ̆t đei ƀơm dih băl tôch kơtang, vei kơjăp hơnăp kăl lơ̆m hơmet pơ ‘lơ̆ng groi teh, atŏk tơ iung tơdrong tĕch răt teh, hnam oei păng pơtrŭt tŏk mŭk drăm. Khul kơdră chĕp pơgơ̆r Teh đak tơchĕng vă pơgơ̆r ‘măng hop akŏm tơ iung pơjing khôi luơ̆t lơ̆m năr 15/9 vă ăn tơgop nơ̆r hơdrol kơ pơtruh ăn Kuô̆k hô̆i. Găh groi teh, Thủ tướng athei pơm pơkeh rim tơdrong tơchơ̆t găh pơjao, ăn mơng teh, pơgơ̆r tơchă bơngai răt măt, kơjă teh păng proh hơmet găh kơjă tŏk dơ̆ng đơ̆ng teh kơ yuơ prơprŏ vă jang iŏk đei; adoi tơplih ‘nao trong jang iŏk tơvih teh, đơ̆ng hrŭ ăn muk drăm jing pơjing tơdrong hơrih sa ăn kon pơlei. Găh hnam oei, kăl lăng kơjăp atŏk tơ iung hnam oei akŏm, ‘nĕ gan chĕng tech tơ̆ tơring kơdrơ̆m, pơjing trong hơvơn tơmơ̆t jên jang hnam oei ăn mơng păng dăr lăng răt pơ ‘ngơ̆m, iŏk yoa sa kơdih.