Hmach chơt hơ iă ăn kơ yă Jennifer Wicks đei pôk tơmơ̆t pơm Kơdră tang măt teh đak Mi tơ̆ Việt Nam, Thủ tướng pơtruh nơ̆r apĭnh jet gia hăm Ƀok kơdră tơm Mi Donald Trump păng hmach chơt hơ iă ăn Khul kơdră chĕp pơgơ̆r, kon pơlei Mi ƀlep lơ̆m năr tơbăt 250 sơnăm Quốc khánh. Thủ tướng sơkơ̆t hơdăh Việt Nam lăng teh đak Mi jĭ mĭnh lơ̆m dôm teh đak jang hơdoi gĭt kăl tơm dơnơm; tơgŭm djru Mi jĭ teh đak iung jang kơtang ăn tơdrong rơngei hiôk hian, sơđơ̆ng păng hơnŭk hơnoa tơ tơring păng lơ̆m apŭng plĕnh teh. Thủ tướng akhan ƀar păh kăl atŏk kơtang jang hơdoi mŭk drăm-tơpôl kiơ̆ trong trŏ lăp, kơjăp ‘lơ̆ng, vang đei iŏk yoa; tĕnh koăng hơmet pơ ‘lơ̆ng tơhlăk tơhlĭn păng hrôih jang keh đang pơma đam, kĭ pơkăp Tơdrong tơchơ̆t mơdro sa hiôk hian, hơtŏ dih hơnơ̆ng păng hơtŏ dih băl, pơjing đei tơdrong sơđơ̆ng vă hơnih mơdro sa ƀar teh đak pơih să tơmơ̆t jên jang, pơm tơlĕch, tĕch mơdro.

Kơdră tang măt Jennifer Wicks tơbăt, teh đak Mi lăng kăl tơgoăt tơgoăl hăm Việt Nam; hăm trong tơlĕch ăn “hưch hanh hơmanh bơnê jĭ teh đak jang hơdoi kơ Việt Nam” atŭm hăm nơ̆r bơnê đơ̆ng Ƀok kơdră tơm Donald Trump păng Kơdră jang tơbôl Marco Rubio pơtruh ăn Kơdră chĕp pơgơ̆r tơm dơnơm Việt Nam đơ̆ng rŏng dôm nơ̆r hmach chơt hơ iă ƀlep lơ̆m năr tơbăt 250 sơnăm Quốc khánh teh đak Mi. Kơdră tang măt teh đak Mi pơma hơdăh jang hơdoi mŭk drăm-mơdro sa hơnơ̆ng jing trong jang kăl hloh lơ̆m jăl jang kơ yă. Kơdră tang măt hơpơi ‘meh vă ƀar păh vei kơjăp pơma dơnuh dih băl ‘lơ̆ng hơ iă vă hrôih iŏk đei drơ̆ng mĭnh nơ̆r mơdro sa ‘lơ̆ng hơ iă, hơtŏ hơnơ̆ng păng hơtŏ dih băl, đơ̆ng noh pơjing dơ̆ng rơvơn mŭk drăm, tơmơ̆t jên jang ăn pơđĭ ƀar teh đak.