Pơgê năr 18/5, Hơnih tơm Khoa hŏk păng Kmăi kmŏk pơgơ̆r pơm lêh kơ kuh chơt hơ iă Năr Khoa hŏk, Kmăi kmŏk păng Tơplih ‘nao tơchăr Việt Nam păng Hop akŏm tơlĕch jang kmăi kmŏk kăl hăm hơnăn “Khoa hŏk, Kmăi kmŏk, tơplih ‘nao tơchăr păng tơplih kơsô̆ - Jơhngơ̆m pran kơ trong tŏk mŭk drăm ‘nao”. Iung pơma tơ̆ jơ pơm lêh, Thủ tướng Lê Minh Hưng sơkơ̆t hơdăh, Năr Khoa hŏk, Kmăi kmŏk păng Tơplih ‘nao tơchăr Việt Nam ưh khan lăp jơ ‘năr pôk pơ ư khul bơ̆ jang hơgei, bơngai khoa hŏk mă oei tơgop pơm hơtŏk jơhngơ̆m đon hưch hanh hơmanh bơnê găh jơhngơ̆m đon gơh hơgei Việt Nam. Thủ tướng pơma hơdăh, Khoa hŏk, Kmăi kmŏk, tơplih ‘nao tơchăr păng tơplih kơsô̆ ‘noh jơhngơ̆m pran tơm vă iung jang kiơ̆ đei tơdrong hơpơi ‘meh vă atok tơ iung teh đak; adoi athei Hơnih tơm Khoa hŏk păng Kmăi kmŏk akŏm hơmet pơ ‘lơ̆ng rim tơdrong tơhrăk hơhlĭn găh trong jang jên hu, akŏm iung jang lơ̆m dôm kmăi kmŏk tơm dơnơm hloh, kmăi kmŏk gĭt kăl păng hơnih jang mơdro sa pơm tơlĕch kmăi kmok.