VOV4.Bahnar - Kơsơ̆ au năr 25/7, Thủ tướng Tĕh đak Phạm Minh Chính năm ngôi, bơ̆ jang hăm rim hơnĭh jang khăm hơlen ADN kơting ƀô̆ đô̆i lôch dong tĕh đak oei tim măt kơnăl ‘nŏh đei Dơnŏ anĭh tơm jang pơgang Ƀô̆ đô̆i, Dơnŏ anĭh tơm Ƀô̆ đô̆i vei lăng sơlam tĕh đak; Viện pháp y quốc gia, găh Dơnŏ anĭh tơm vei lăng jang pơgang păng Viện Công nghệ sinh học, găh Viện Hàn lâm Khoa học păng Kmăi kmŏk Việt Nam.

Thủ tướng atŭm hăm rim kơdră tang măt ăn Hơnĭh tơm, hơnĭh jang pơjao hla bơar khăm hơlen ADN ăn 12 ŭnh hnam ƀô̆ đô̆i lôch dŏng tĕh đak

Tơ̆ jơ bơ̆ jang, Thủ tướng Phạm Minh Chính tơroi tơbăt tơdrong mă pơm ăn kơ ƀok ƀrơ̆k jơhngơ̆m, ƀlŏk hơdơ̆r hơnơ̆ng găh tơdrong chhôk nă đơ̆ng mĭnh ‘nu Yă Mĕ Việt Nam nuih mơng oei tơ̆ Nghệ An mư̆h tơbăt ƀô̆h kơting kon hơ ‘lơ̆p đơ̆ng rŏng 51 sơnăm lôch răm; adoi nhen sơ ‘nhôi kơ bơngai mĕ tŏk bŏk gô chang kơ yuơ oei tim mă tơchă ƀô̆h kơ ting mĭnh ‘nu kon hơ ‘lơ̆p dơ̆ng. Tơblăh vang hlôi pơdơ̆h mă lei jơhngơ̆m đon ơ̆h sơ ‘ngon oei ling lang gei kơ jăp hăm dôm ŭnh hnam đei bơngai lôch dŏng tĕh đak; kơ hrĕng rơbau ƀô̆ đô̆i lôch răm oei tim mă băt hơdăh jing kơ trĭu jơhngơ̆m đon ơ̆h sơ ‘ngon, gô chang đơ̆ng bơngai oei erĭh.

Thủ tướng sơkơ̆t hơdăh, Đảng, Tĕh đak păng kon pơlei ling lang lăng ba kơ jăp trŭh bơ̆ jang vei lăng năng tông bơngai rơka, ƀô̆ đô̆i lôch dŏng tĕh đak vă pơm dă ƀiơ̆ ơ̆h sơ ‘ngon hăm rim trong jang hơdăh, lơ̆m au atŏk kơtang năm tơchă, kôch akŏm păng hơlen tơchă băt hơdăh hơnăn dôm ƀô̆ đô̆i lôch dŏng tĕh đak. Tơ̆ jơ bơ̆ jang, Thủ tướng Phạm Minh Chính hlôi vang pơm lêh tơbăt hơdăh pơtôch bơ̆ jang khăm hơlen ADN rim ƀô̆ đô̆i lôch dŏng tĕh đak; atŭm hăm rim kơdră tang măt ăn Hơnĭh tơm, hơnĭh jang pơjao hla bơar khăm hơlen ADN ăn 12 ŭnh hnam ƀô̆ đô̆i lôch dŏng tĕh đak; pôk ăn kơsơ̆p hla bơar mong jên kơ jă kơ jên 10 trĭu hlak jên păng tơmam drăm ăn rim ŭnh hnam ƀô đôi lôch dŏng tĕh đak.

Tơblơ̆ nơ̆r: Amazưt