VOV4.Bahnar - Ƀlep ƀơ̆t Têt joăt joe Chôl Chnăm Thmây sơ năm 2022 kơ kon pơ lei Khmer, Thủ tướng teh đak Phạm Minh Chính hlôi gơ̆ih kơ thơ hmach chơt hơ iă truh kon pơ lei, rim bơ ngai păng khŭl lui phât bơ ngai Khmer. Hmach kơ kon pơ lei, rim bơ ngai păng khŭl lui phât bơ ngai Khmer sơng têt joăt joe Chôl Chnăm Thmây sơ năm 2022 chơt hơ iă, ‘lơ̆ng păng hiôk hian, Thủ tướng pơ ma hơ dăh: Têt joăt joe Chôl Chnăm Thmây - tơ drong joh ayŏ ‘lơ̆ng hơ iă kơ kon pơ lei Khmer - yak truh 1 sơ năm ‘nao pŭn ai, ‘lơ̆ng rŏ. Sơ năm 2022 jĭ sơ năm gĭt kăl jang kiơ̆ dôm tơ drong hơ găt tơ lĕch trong jang hơ tŏk tơ iung mŭk drăm - tơ pôl jăl jang 2021 - 2025; jĭ sơ nămblŭng jang kiơ̆ 02 trong jang tơ gŭm tih găh tơ drong jang kon kông, thủ tướng ‘meh vă păng lui ngeh kon pơ lei, khŭl bơ ngai lui phât bơ ngai Khmer gô hơ nơ̆ng hơ tŏk tơ drong joăt joe ‘lơ̆ng hơ iă, jơ hngơ̆m đon tơ goăt tơ goăl, kŭm hăm rim kơ dră, rim anih jang hơ drin yak hloh rim tơ drong mơ mat tat, long nol, ưh kơ pơm pơ hơi hăm jĭ hơ buh, hơ drin jang kiơ̆ jơ nei dôm tơ drong hơ găt hơ tŏk tơ iung mŭk drăm - tơ pôl, vei sơ đơ̆ng teh đak, sơ đơ̆ng tơ pôl.

Thuem: Tơ blơ̆