VOV4.Bahnar - Kơ sơ̆ ‘năr 19/7, ƀlep ƀơ̆t tơ băt 75 sơ năm năr Lĭnh jĭ rơ ka lĭnh lôch dơ̆ng teh đak Thủ tướng teh đak Phạm Minh Chính hlôi năm tơ mang păng asong tơ mam ăn kơ đe lĭnh jĭ rơ ka tơ̆ Anih rong hơ met lĭnh jĭ rơ ka Kim Bảng, dêh char Hà Nam.

Thủ tướng năm tơ mang tơ̆ Anih rong hơ met lĭnh jĭ rơ ka Kim Bảng, dêh char Hà Nam

Tang măt Kơ dră Đảng, teh đak păng hăm tơ drong ‘mêm đơ̆ng kơ dih, Thủ tướng teh đak Phạm Minh Chính hlôi gơ̆ih truh đe lĭnh jĭ rơ ka, lĭnh jĭ jăn, bơ ngai đei kŏng hăm kach mang lơ̆m teh đak păng đe ‘nhŏng đe mŏ lĭnh jĭ rơ ka, jĭ jăn tŏk bŏk rong hơ met tơ̆ Anih rong hơ met lĭnh jĭ rơ ka Kim Bảng nơ̆r apĭnh jet gia păng dôm tơ drong ‘mêm gĭt kăl hloh. Thủ tướng chơt hơ iă ƀơ̆t đei băt Anih rong hơ met dang ei ‘noh jĭ hnam atŭm tơ nŏ ‘mêm mơ nat đơ̆ng 77 ‘nu lĭnh jĭ rơ ka, lĭnh jĭ jăn ăl, ưh kơ kĕ jang đơ̆ng 81% tơ̆ kơ pal păng 35 ‘nu bơ ngai ŭnh hnam bơ ngai đei kŏng.

Thủ tướng năm tơ mang tơ̆ Anih rong hơ met lĭnh jĭ rơ ka Kim Bảng, dêh char Hà Nam

Ƀlep ƀơ̆t ‘măng âu, Thủ tướng athei Anih tơm vei lăng bơ ngai jang, lĭnh jĭ rơ ka păng tơ pôl păng dôm anih jang ƀơm truh bơ̆ jang kiơ̆ tơ păt trong jang tơ gŭm hăm bơ ngai đei kŏng hăm kach mang, băt hơ dăh tơ drong vei lăng bơ̆ jang kiơ̆ trong jang tơ gŭm bơ ngai đei kŏng ‘noh jĭ hơ năp jang hơ nơ̆ng, đunh đai đơ̆ng pơ đĭ khŭl jang chĭnh trĭ păng lơ̆m tơ pôl.

Thuem: Tơ blơ̆