VOV4.Bahnar - Pơ gê ‘năr 29/9, tơ̆ Anih jang kơ ƀok Kơ dră teh đak, Thủ tướng teh đak Phạm Minh Chính pơ gơ̆r Lêh sơng Thủ tướng Cộng hòa Cuba Manuel Marrero Cruz kŭm hăm Khŭl tang măt gĭt kăl kơ Khŭl kơ dră teh đak Cuba năm ngôi tơ̆ Việt Nam. Lăp đơ̆ng rŏng lêh sơng, Thủ tướng teh đak Phạm Minh Chính păng Thủ tướng Cộng hòa Cuba Manuel Marrero Cruz pơ gơ̆r pơ ma đam. ‘Nâu jĭ ‘măng năm ngôi đơ̆ng Thủ tướng Cuba Manuel Marrero Cruz vă tơ lĕch jang dôm tơ drong drơ̆ng nơ̆r iŏk đei đơ̆ng kơ dră chĕp kơ̆l gĭt kăl 2 teh đak, pơ tăl dơ̆ng păng hơ tŏk tơ iung tơ drong pơ vei gĭt kăl Việt Nam-Cuba, tơ ƀôh jơ hngơ̆m đon khŏm jang đơ̆ng 2 păh lơ̆m tơ drong hơ nơ̆ng hơ tŏk tơ iung păng vei kơ jăp hloh dơ̆ng tơ drong pơ vei jang tơ bôl, 1 jơ hngơ̆m đon, lui ngeh dih băl, jang hơ dai tôm tơ drong đơ̆ng Đảng, teh đak, Khŭl kơ dră teh đak păng kon pơ lei 2 teh đak.

Thủ tướng teh đak bơ̆n pơ gơ̆r Lêh sơng Thủ tướng Cộng hòa Cuba

Ƀlep lơ̆m ‘măng năm ngôi, Thủ tướng Cuba gô chơt hơ iă sơng iŏk Mê đai Hồ Chí Minh; vang truh pơm lêh kĭ pơ kăp hla ar kăl jang hơ dai đơ̆ng 2 păh; vang truh hop akŏm anih jang mơ dro sa Việt Nam-Cuba; tơ ƀơ̆p kơ dră chĕp kơ̆l pơ lei tơm Hồ Chí Minh păng 1,2 tơ drong jang nai hai.

VOV-Thuem tơ blơ̆