VOV4.Bahnar - Pơ gê ‘năr 5/7 Thủ tướng teh đak Phạm Minh Chính pơ gơ̆r ‘măng hop akŏm ‘măng mă 15 kơ Anih pơ gơ̆r jang teh đak tang găn jĭ COVID-19. Pơ ma tơ̆ jơ hôp Thủ tướng teh đak Phạm Minh Chính athei dôm bơ ngai tang măt akŏm pơ ma dơ nuh, hơ len lăng găh tơ drong jĭ hơ buh lơ̆m apŭng plĕnh teh, tơ ring păng lơ̆m teh đak, dôm đei tơ plih ‘nao, pha, dôm tơ drong krê hơ mơt, dôm tơ drong jơ nei iŏk đei, dôm tơ drong tam mă đei, tơ blang hơ dăh dôm tơ drong tơm pơm ăn, tơ lĕch ăn tơ drong hơ găt, đon tơ chĕng jang, đon pơ gơ̆r, trong jang vă hơ nơ̆ng tơ drong jang tang găn jĭ COVID-19 tơ̆ hơ năp kơnh. Hrei ‘nâu, tơ̆ lơ̆m teh đak bơ̆n, oei đei tơ ring, ƀơ̆t lăp oei ưh kơ ‘lơ ‘lŏ, pơm pơ hơi đơ̆ng rŏng jĭ hơ ƀuh đei vei lăng, mă loi ‘noh tơ drong ƀet vaccine oei hiơ̆, tam mă iŏk đei tơ drong hơ găt tơ lĕch ăn, lơ̆m noh đei tơ drong ƀet vaccine ăn hơ ioh đơ̆ng 5 truh 11 sơ năm păng jrŭm mă 3 ăn bơ ngai đơ̆ng 12 truh 17 sơ năm, mă đơ̆ng Khŭl kơ dră teh đak, Thủ tướng teh đak hlôi hơ nơ̆ng pơ gơ̆r jang. Thủ tướng Phạm Minh Chính pơ ma hơ dăh, ưh kơ gơh pơm pơ hơi, ưh kơ ‘lơ ‘lŏ; athei đei trong jang kơ chăng, ‘lơ̆ng”. Lơ̆m noh, tơ pă yan âu ăn ƀôh vaccine oei jing pơ gang tang găn đei yua hloh. Tơ drong ƀet vaccine ‘noh jĭ tơ drong đei yua, hơ năp jang păng tơ drong jang đơ̆ng rim ‘nu bơ ngai vă vei lăng kơ dih kâu, ŭnh hnam păng tơ pôl.

Thuem: Tơ blơ̆