VOV4.Bahnar - Pơgê năr 4/4, tơ̆ hơnĭh bơ̆ jang Khŭl kơdră tĕh đak, Thủ tướng Tĕh đak Phạm Minh Chính pơm tơm hop akŏm Khul kơdră chep pơgơ̆r Tĕh đak khei 3 lăng hơlen dơ̆ng pơtôch bơ̆ jang khei 3 păng lăng dơ̆ng jăl I/2022. Thủ tướng tơbăt, tơdrong chĭnh trĭ ư̆h sơđơ̆ng, tơdrong pơjei tĕh đak tĭh kơtang, kơ jă đak xăng đak dau tŏk măt păng kơ jă tŏk jur lơ tĕh đak tŏk kơtang; tơdrong jĭ hơbŭh hơnơ̆ng pơrăm kơtang, pơm kơnê̆ trŭh tơdrong jang mŭk drăm, pơm tơlĕch, tĕch mơdro lơ̆m tĕh đak. Thủ tướng athei, kăl lăng hơlen kơtang dôm tơdrong nhen tơlĕch kon jên tĕh đak tơmơ̆t jang oei tim mă kơtang, oei tim mă ‘lơ̆ng; tơdrong tơmam drăm tĕch ư̆h kơ hlot kơtang tơ̆ tơring sơlam tĕh đak hlôi iung jang kơtang mă lei xek tơlang tim mă keh đang; mĭnh ƀar khŭl kon pơlei tơring atăih yăih oei tơnap tap; lơ̆m tơdrong ƀet bơ̆ng vaccine tim gan kơchăng, tơdrong ƀet bơ̆ng oei tim mă jơnei nhen ‘mĕh vă, kăl tĕnh koăng hơmet pơ ‘lơ̆ng dôm tơdrong xek tơlang tim mă keh đang lơ̆m jăl I sơnăm 2022; iung tơ jră ‘lơ̆ng rim tơdrong đei ƀô̆h dơ̆ng.

Tơblơ̆ nơ̆r: Amazưt