VOV4. Bahnar - Pơgê năr 8/8, tơ̆ Hơnĭh bơ̆ jang Khŭl kơdră tĕh đak, Thủ tướng tĕh đak, Kơdră chĕp pơgơ̆r Tĕh đak găh jang kiơ̆ kmăi kmŏk kơsô̆ Phạm Minh Chính pơm tơm ‘Măng hop akŏm mă Pêng kơ Dơnŏ anĭh vă lăng hơlen pơtôch jang kiơ̆ kmăi kmŏk kơsô̆ 6 khei blŭng sơnăm 2022 păng sơkơ̆t hơdăh dôm trong jang tơplĭh kơsô̆ lơ̆m khei năr kơnh. Mư̆h jĭ hơbŭh Covid-19 pơrăm kơtang, tơdrong jang kiơ̆ kmăi kmŏk kơsô̆ hlôi jing tơdrong kăl hlŏh hăm rim hơnih jang, rim tơring tơrang păng kon pơlei, hơnĭh mơdro sa vă tang găn pơrang jĭ jơnei adoi hơmet pơ ‘lơ̆ng, atŏk tơ iung mŭk drăm-tơpôl.

Mư̆h jĭ hơbŭh đei tang găn kĕ ƀiơ̆, tơdrong jang kiơ̆ kmăi kmok kơsô̆ hơnơ̆ng jing bơ̆ jang kăl hlŏh, tơgop gĭt kăl hơmet pơ ‘lơ̆ng tĕnh koăng, atŏk tơ iung kơ jăp mŭk drăm-tơpôl, tơ iung pơjing jang mŭk drăm kơdĭh, pơm tơm kơdĭh tơklep hăm iung jang hơdrin vang mơ̆t hơdoi apŭng plĕnh tĕh kơtang hlŏh dơ̆ng, jơnei hlŏh dơ̆ng. Lơ̆m ‘măng hop akŏm au, Thủ tướng athei rim kơdră tang măt pơma tơlĕch mă hơdăh, mă tơpăt, tơƀô̆h tơbăt hăm rim tơdrong jang hơdăh găh jang kiơ̆ lơ̆m khei năr au ki, hơlen hơdăh tơdrong jang đei pơjao kiơ̆ trong Pơ prŏ tơdrong jang sơnăm 2022 kơ Dơnŏ anĭh bơ̆ jang tĕh đak găh jang kiơ̆ kmăi kmŏk kơsô̆ păng dôm tơdrong jang đei pơjao tơ̆ ‘Măng hop akŏm hơdrol kơ ‘nŏh kơ Dơnŏ anĭh au.

Tơblơ̆ nơ̆r: Amazưt