VOV4. Bahnar - Pơgê năr 4/7, kơ yuơ Thủ tướng tĕh đak Phạm Minh Chính, hlôi đei pơgơ̆r blŭng a Hop akŏm trư̆k tuyên Khŭl kơdră Tĕh đak hăm rim tơring păng ‘măng hop akŏm joăt joe Khŭl kơdră Tĕh đak khei 6 sơnăm 2022 găh tơdrong jang mŭk drăm-tơpôl khei 6 păng 6 khei sơnăm 2022.

Iung pơma tơ̆ Hop akŏm, Thủ tướng Tĕh đak Phạm Minh Chính tơbăt, Mŭk drăm-tơpôl khei 6 păng 6 khei sơnăm 2022 ‘lơ̆ng hơ iă lơ̆m rim tơdrong, pơjing hơyak pran ăn atŏk tơ iung. Tơdrong jang mŭk drăm sơđơ̆ng, kơ jă tŏk jur đei vei lăng kơ jăp mă đơ̆ng đak xăng đak dau tŏk măt, sơđơ̆ng tơdrong thuê̆ ăn hơnĭh mong jên bơ̆ jang tĕh đak, tĕch mơdro tơmam drăm tơ̆ tĕh đak đe, pơtrŭh bơngai jang, ŭnh hơyŭh păng tơmam drăm sa. Thủ tướng pơma hơdăh, dôm tơdrong iŏk đei au jĭ kơ gơnơm đơ̆ng tơdrong chĕp pơgơ̆r ‘lơ̆ng hơ iă gơ̆h hơgei đơ̆ng Khul kơdră chĕp pơgơ̆r Trung ương Đảng, Dơnŏ anĭh tơm Chĭnh trĭ, Ban Bí thư, dơ̆ng hơlau ‘nŏh Tổng Bí thư Nguyễn Phú Trọng, atŭm hăm rim trong jang gĭt kăl đơ̆ng Tĕh đak, lơ̆m au đei rim Tơdrong tơchơ̆t đơ̆ng Kuô̆k hô̆i; tơdrong chĕp pơgơ̆r, pơrô̆ jang kơtang, trŏ lăp đơ̆ng Khŭl kơdră chĕp pơgơ̆r Tĕh đak, Thủ tướng Tĕh đak, tơdrong kơrŭn đĭ ai đơ̆ng pơ đĭ khŭl jang chĭnh trĭ atŭm hăm rim hơnĭh mơdro sa, tơdrong lăp đon, vang tơgŭm djru đơ̆ng kon pơlei lơ̆m teh đak păng tơdrong tơgŭm djru đơ̆ng bôl boăl tĕh đak đe.

Tơblơ nơ̆r: Amazưt