VOV4. Bahnar - Pơgê năr 27/4, tơ̆ Hơnĭh bơ̆ jang Khŭl kơdră chĕp pơgơ̆r Tĕh đak, Thủ tướng Tĕh đak Phạm Minh Chính pơm tơm ‘măng hop akom mă 2 kơ Dơnŏ anĭh bơ̆ jang tĕh đak găh tơplĭh jang kiơ̆ kơsô̆. ‘Măng hop akŏm đei pơgơ̆r trư̆k tuyên trŭh 63 dêh char lơ̆m tĕh đak. Iung pơma tơ̆ hop akŏm, Thủ tướng Phạm Minh Chính pơma hơdăh, jang kiơ̆ kơsô̆ tĕh đak ‘nŏh jing tơdrong jang kăl hlŏh, tơgoăt dĭh băl 3 hơnĭh jang tơm ‘nŏh Khŭl kơdră chĕp pơgơ̆r jang kmăi kmŏk kơsô̆, tơdrong jang mŭk drăm păng tơpôl kơsô̆. Đảng, tĕh đak, Khŭl kơdră chĕp pơgơ̆r Tĕh đak, Thủ tướng tĕh đak lăng ba tôch kơ jăp trŭh bơ̆ jang tơplĭh kơsô̆, lăng trŭh Khŭl kơdră jang kmăi kmŏk kơsô̆, tơdrong jang mŭk drăm kơsô̆, tơpôl kơsô̆, kon pơlei kơsô̆. Thủ tướng athei dăr lăng dơ̆ng tơdrong tơchơ̆t kơ yuơ ‘nau ‘nŏh 1 lơ̆m 3 trong iung jang gĭt kăl hlŏh; tơmơ̆t dơ̆ng, pơm pơkeh tơdrong tơchơ̆t kăl đei kmăi kmŏk, mă kăl kmăi kmŏk pơre nơ̆r, atŏk tơ iung kmăi kmŏk kơsô̆, ư̆ng yŭng kmăi kmŏk kơsô̆; kăl chă hơvơn đei kon jên jang, bơngai jang; atŏk kơtang jang hơdoi tĕh đak kon pơlei vang tơmơ̆t jên jang, chă hơvơn tơdrong vang tơgop đơ̆ng kon pơlei. Tơdrong mă kăl hlŏh ‘nŏh tơdrong chĕp pơgơ̆r lơ liơ vă jang kiơ̆ kmăi kmŏk kơsô̆ mĭnh păh gơ̆h hơgei, adoi trŏ ƀlep hăm tơdrong jang, hăm tơdrong muk drăm, tơdrong gơ̆h jang; adoi atŏk tơ iung pơjing đei khŭl jang gơ̆h hơgei.

Tơblơ̆ nơ̆r: Amazưt